Մշակութային գործիչները նոր կառավարությունից ակնկալիքներ ունեն

Մշակույթը անհրաժեշտություն է երկրի բոլոր ոլորտների` այդ թվում տնտեսության համար: Նոր կառավարության ձևավորումը նաև մշակութային գործիչների համար նոր սպասելիքների ու ակնկալիքների առիթ է: Ապրիլի 14-ին հրավիրված ասուլիսում Երևանի Հովհ. Թումանյանի անվան Տիկնիկային թատրոնի գեղարվեստական ղեկավար Ռուբեն Բաբայանը շեշտեց, որ առանց լավ մշակույթի կյանքի և ոչ մի ոլորտ չի կարող գոյատևել:

«Մշակույթը ատամ մաքրելու մածուկ է, եթե չկա մշակույթ, ապա մի դժգոհեք կարիեսից: Մշակույթը պետք է տնտեսությանը, այն թելադրում է կիրթ խաղի կանոններ: Իսկ եթե պատգամավորները իրար հետ «արա»-ով են խոսում, լավ տնտեսական քաղաքականություն մի սպասեք»,- ասաց Բաբայանը: Նա անկեղծացավ, որ առանձնապես մեծ սպասելիքներ վախուց չունի, սակայն ինքն աշխատում է մի թատրոնում, որտեղ արվեստով զբաղվելը տոն է:

«Ինչքան էլ արգելեն, վատ պայմաններ ստեղծեն, դու արվետագետ ես, կմնաս արվետագետ, Փարաջանովը բանտում էլ էր մնում արվետագետ: Փարաջանովին բանտ նստեցնելը պետության խնդիրն էր, ոչ թե Փարաջանովինը»,- կարծիք հայտնեց թատրոնի գեղարվեստական ղեկավարը:

Նա ցանկանում է, որպեսզի նոր կառավարությունը, իշխանություններն իրենց համար հստակեցնեն, թե ինչպես են տեսնում ապագան և որտեղ են տեսնում այն:

«Որտեղ ասելով` նկատի չունեմ պրիմիտիվ բաժանում, Միացում մաքսային միությանը կամ նման այլ բան, այլ նկատի ունեմ այն, թե արժեքային ի՞նչ համակագում ենք տեսնում ապագան, ինչի՞ համար ենք պայքարում, և ինչի՞ համար ենք ապրում, մինչև այդ հարցի պատասխանը չտանք, արտագաղթի դեմը չենք առնի»,- ընդգծեց մշակութային գործիչը:

Նրա գնահատմամբ, այն, ինչ անում ենք, չի կարող լինել միայն նեղ ուրախությունների, պերճանքի համար:

«Եթե մշակույթը չի ազնվականացնում մարդուն, հարաբերությունները, մեր արածը գրոշի արժեք չունի»,- ավելացրեց Բաբայանը:

Ճարտարապետ Լևոն Իգիթյանի կարծիքով, մտավորական պետք է համարվի ոչ թե այն մարդը, ով բարձրագույն կրթությունի ունի կամ 15 գիրք է կարդացել: Մտավորական լինելն առաջին հերթին բարոյական կատեգորիա է:

«Հաճախ ասում են, թե ինչու են մտավորականներն իրենց հեռու պահում իշխանությունից: Որովհետև իրենց գործով են զբաղված: Դանակ-մկրատ սրողների պես փողոցում չենք կարող ման գալ: Բոլոր ժամանակներում, բոլոր թագավորների կողքին մտավորականներ կային, և թագավորն էր նրանց հրավիրում զրույցի»,- նշեց Իգիթյանը:

Նրա հավաստմամբ, այսօր մենք պետք է առավել լավ օգտագործենք այն ներուժը, որով կարող ենք հայկական մշակությը առավել լավ ներկայացնել արտերկրում:

Բանախոսները համաձայնեցին այն հարցի շուրջ, որ այսօր, ի տարբերություն նախորդ տասնամյակների, հանրության արժեհամակարգը փոփոխություն է կրել:

Նրանք հույս հայտնեցին, որ առաջիկայում մշակութային կառույցների հանդեպ կավելանա իշխանությունների ուշադրությունը: