«Հրապարակ». Ինչպես միշտ, ընտրեցինք ամենավատ ճանապարհը

Մենք, ինչպես միշտ, ընտրեցինք ամենավատ ճանապարհը' քաղաքական դաշտը չհստակեցնելու, երկրում առկա շիլաշփոթը պահպանելու ճանապարհը: Նախընտրեցինք պահպանել այն ճահիճը, որի մեջ հայտնվել է մեր երկիրը: Այն խառնաշփոթը, երբ ոչ ոք չի հասկանում' ով է ընդդիմություն, ով իշխանություն, ով է պատասխանատու քաղաքական ճգնաժամի եւ տնտեսական անկման համար, ով կարող է երկիրն այս վիճակից հանել, երբ եւ ինչպես:

Ակնհայտ է, որ իշխող մեծամասնությունը չի կարողանալու ոչինչ փոխել երկրում եւ խնդիրը բոլորովին էլ վարչապետի անձի մեջ չէ, խնդիրը համակարգային է, երկրում ձեւավորված հարաբերություններից ու կառավարման ձեւից բխող: Իսկ Հովիկ Աբրահամյանի վարչապետ նշանակվելով երկրի թիվ մեկ խնդիրը' քաղաքական համակարգի հետ սերտաճած օլիգարխիան, նոր շունչ կառնի ու նոր զարթոնք կապրի: Չէ որ իրենց «համքարության» ամենակարկառուն ներկայացուցիչն այլեւս լայն լիազորություններ ունի եւ հսկայական լծակներ: Այս նշանակմամբ մեկ այլ ստվերային երեւույթ էլ կծաղկի' երկերեսանի ու կեղծ ընդդիմությունը, որը պատասխանատվություն չի ստանձնի, բայց իշխանությունից «մաս» կունենա:

Մասնավորապես` «տակից» վարչապետ նշանակած ԲՀԿ-ն կշարունակի պահպանել ընդդիմադիրի կեցվածքը եւ այդպես էլ ընտրողը չի կարողանա զատել իրական ընդդիմադիրին կեղծից, քանի որ պոռոտախոսությամբ ռեկորդներ սահմանած անձինք կշարունակեն մի կողմից օգտվել վարչապետի «խնամիությունից», մյուս կողմից քարկոծել ու քննադատել իշխանության «ոչ խնամի» հատվածին: Եւ մեր ակնկալիքները' իրական ընդդիմություն ձեւավորվելու մասով, անորոշ ժամանակով կհետաձգվեն: Դա նշանակում է, որ 2017-18-ին մենք ընտրությունների կգնանք նույնքան անորոշ ու հուսալքված, նույնքան չկողմնորոշված ու անվստահ, ինչպես գնում էինք 2013-ին:

Շարունակությունը` «Հրապարակ» օրաթերթի այսօրվա համարում: