ՀՅԴ-ն չի կարող կոալիցիայի մաս կազմել. քաղաքագետ

Կառավարությունում արմատական փոփոխություններ չեն լինի, վարչապետի հրաժարականն էլ անհիմն ուռճացվեց: Տեսակետը քաղաքագետ Լևոն Շիրինյանինն է: Նա առաջարկում է հիշել Սահմանադրության դրույթները' հասկանալու համար, որ երկրում վարչապետի հրաժարականից հետո լուրջ փոփոխություններ չեն կարող լինել, քանի որ գլխավոր պատասխանատուն նախագահն է:

«Վարչապետն ընդամենը մենեջերի դերակատարություն ունի, որ իրականացնում է նախագահի ծրագրերը»,- ապրիլի 15-ին լրագրողների հետ հանդիպման ժամանակ ասաց քաղաքագետը' հավելելով, որ վարչապետ Տիգրան Սարգսյանի հրաժարականն ու հետագայում նոր վարչապետի նշանակման հետ կապված ձգձգումներն ընդամենը ուշադրություն գրավելու նպատակ էին հետապնդում: Անդրադառնալով նոր վարչապետին, քաղաքագետը նշում է, որ առանց աշխատանքը տեսնելու չի կարելի բացասական գնահատական հնչեցնել, միաժամանակ, Շիրինյանը խորհուրդ է տալիս մեծ հույսեր չփայփայել: Այս պարագայում, ըստ քաղաքագետի, լավագույն տարբերակն այն է, որ երկրում շարունակվի քաղաքացիական պայքարն ու իշխանության վրա ճնշումները: Նրա գնահատմամբ, վարչապետի գլխավոր խնդիրը պետք է լինի վերահաստատել իշխանության հեղինակությունը: Այս առնչությամբ քաղաքագետը մեծ կարևորություն է տալիս հասարակական դերակատարմանը: Նրա գնահատմամբ, հասարակությունը պետք է ակտիվ դերակատարում ունենա, քաղաքացու կարծիքը պետք է հարգվի, իսկ բարձրացված խնդիրները չանտեսվեն:

Ըստ Շիրինյանի` նոր վարչապետը պետք է տնտեսական նոր հայեցակարգ սահմանի և ուշադրությունը սևեռի երկու կարևոր խնդրի' արտագաղթի կասեցման և կոռուպցիայի դեմ պայքարի վրա: Վերջինի առնչությամբ քաղաքագետն առաջարկում է, որ համապատասխան օրենսդրական լրացումներ կատարվեն և կոռուպցիան համարվի պետական դավաճանություն:

Անդրադառնալով նոր կառավարության գործունեությանը' քաղաքագետն անիմաստ է համարում կոալիցիայի կազմումը: «Եթե ՀՀԿ-ն մեծամասնություն է, ապա ինքն էլ պետք է իր վրա պարտավորություն վերցնի խնդիրները կարգավորելու համար: Նոր կոալիցիա կազմելու հետ կապված խոսակցություններն ավելի են խճճում իրավիճակը»:

Նախկին դաշնակցականին անհասկանալի է նաև Հայ հեղափոխական դաշնակցություն կուսակցության կեցվածքը: Եթե խորհրդարանում ՀՀԿ-ն մեծամասնություն է, եթե կառավարությունում ՀՀԿ-ն է որոշում կայացնում, ապա, ի՞նչ տրամաբանությամբ են առաջնորդվում դաշնակցականները' հանրապետականներին առաջարկություններ ներկայացնելով:

«ՀՀԿ-ն հաղթել է, բայց պետք է իրականացնի Դաշնակցությա՞ն ծրագրերը»,- զարմանում է Շիրինյանը: Նրա գնահատմամբ, Դաշնակցությունը պետք է ոչ թե կոալիցիա մտնել-չմտնելու հետ կապված «խաղեր տա», այլ երկրում ձևավորի աշխատավորական-սոցիալիստական կուսակցություն: Սա, ըստ քաղաքագետի, Դաշնակցության գլխավոր առաքելությունը պետք է լինի:

Նրա գնահատմամբ, գաղափարախոսական առումով էլ ՀՅԴ-ն չի կարող կոալիցիայի մաս կազմել. ՀՀԿ-ն ու ԲՀԿ-ն բուրժուական գաղափարախոսության կրողներ են, ՀՅԴ-ն' աշխատավորական: