Վլադիմիր Գասպարյանը շնորհավորել է (լուսանկար)

Այսօր Ոստիկանության մասնագիտական տոնի նախօրեին, ոստիկանության պետ, գեներալ-լեյտենանտ Վլադիմիր Գասպարյանը հանդիպում ունեցավ ոստիկանության Երևան քաղաքի վարչության պարեկապահակետային ծառայության գնդի ծառայողների հետ։ Անդրադառնալով Հայաստանի Հանրապետության հասակակից ոստիկանության կենսագրության դրվագներին և այսօր համակարգում ընթացող բարեփոխումներին՝ ոստիկանության պետը կարևորեց այն խնդիրները, որ այսօր պետությունն ու հասարակությունը առաջադրում են ոստիկանությանը, առաջնահերթությունները, որոնք օրենքի ու ժամանակի պահանջն են։ Խոսելով ոստիկանության ծառայողի բարոյակամային չափորոշիչների, իրավապահի պարտքի անվերապահ կատարման և մասնագիտական ունակությունների կատարելագործման մասին' ոստիկանության պետն ընդգծեց, որ անսակարկելի են ոստիկանի պատիվն ու արժանապատվությունը, պատասխանատվությունը գործի հանդեպ, հավատարմությունը երդմանը։ Հանդիպման ավարտին ՜Վլադիմիր Գասպարյանը մասնագիտական տոնի առթիվ շնորհավորանքի խոսք ուղղեց գնդի ծառայողներին: 

Նույն օրը Վլադիմիր Գասպարյանն այցելեց Ոստիկանության զորքերի հասարակական կարգի պահպանման 1033 զորամաս։ Ոստիկանության պետը մոմ վառեց զորամասի մատուռում, ստուգեց ճաշարանի պայմաններն ու զինծառայողների սննդի որակը, ծանոթացավ նրանց հանգստի հնարավորություններին։ Շարահրապարակում ոստիկանության պետին ներկայացվեց զորամասի հատուկ տեխնիկան, ստուգվեց տեխնիկայի պատրաստականությունը, տրվեցին համապատասխան հանձնարարականներ։ Անձնակազմի հետ հանդիպման ընթացքում անդրադառնալով ոստիկանության 96-ամյա ուղուն, Վլադիմիր Գասպարյանը կարևորեց ծառայության դերը Հայաստանի երեք հանրապետությունների պատմության մեջ, անդրադարձավ ոստիկանության կենսագրության հերոսական ու դժվարին դրվագներին: Վլադիմիր Գասպարյանն անդրադարձավ ոստիկանության զորքերի դերին պետականության ամրապնդման ու հասարակության կայացման գործում, յուրաքանչյուր զինծառայողի պատասխանատվությանը երկրի ներքին անդորրի ու քաղաքացու իրավունքների ապահովման համար, և շնորհավորելով զինծառայողներին տոնի առթիվ' նրանց մաղթեց անմնացորդ ծառայություն օրենքին ու ժողովրդին, հավատարմություն մարդասիրական առաքելությանը։ Հանդիպման ավարտին Ոստիկանության զորքերի մի խումբ զինծառայողներ տոնի առթիվ պարգևատրվեցին ոստիկանության պետի կողմից։