«ԱՄՆ սենատի բանաձևը դեռ ոչինչ չի նշանակում». թուրքագետ

Հայաստանում ԱՄՆ սենատի արտաքին հարաբերությունների հանձնաժողովի բանաձևը Հայոց ցեղասպանության վերաբերյալ ընդունեցին սառը և առանց ավելորդ հուզականության: Ըստ թուրքագետ Ռուբեն Մելքոնյանի, առաջին անգամ էր, երբ հասարակությունը կշռադատված մոտեցում ցուցաբերեց` գիտակցելով, որ բանաձևը դեռևս ոչինչ չի նշանակում: Նրա խոսքով, նման բանաձևեր ընդունվել են, սակայն արդյունքը երբեք հայկական կողմի օգտին չի եղել:

Ի տարբերություն Հայաստանի` բանաձևի ընդունմանը խիստ ագրեսիվ կերպով են արձագանքում Թուրքիայում: Ապրիլի 17-ին լրագրողների հետ հանդիպման ժամանակ Մելքոնյանը նշեց, որ Թուրքիայի ողջ վերնախավը ջղաձիգ է և բանաձևի առնչությամբ սուր հայտարարություններ է կատարում: Թուրքիայի կողմից մերժման քաղաքականությունը չի կարող հանգեցնել որևէ արդյունքի, քանի որ թուրքական նման վերաբերմունքը կհանգեցնի ամերիկյան հատուկ վերաբերմունքին:

Ըստ Մելքոնյանի, այս կերպ ԱՄՆ-ն աշխարհաքաղաքական խաղ է խաղում: Միջազգային իրավիճակն այնպիսին է, որ իրադարձությունները տանում են դեպի բեռևացում: Եվ քանի որ Հայաստանի դիրքորոշումը առավելապես Ռուսաստանի կողմն է, ԱՄՆ-ն այս կերպ փորձում է սիրաշահելի Հայաստանին և տեղի հայ համայնքին: Մյուս կողմից` ԱՄՆ-ը հարցն օգտագործում է որպես խաղաթուղթ ընդդեմ Թուրքիայի: Թեպետ Թուրքիայում դա հասկանում են, սակայն շարունակում են ջղակծկումներն ու երբեմն աչքի ընկնում անտրամաբանական քաղաքականությամբ:

Մելքոնյանի խոսքով, Թուրքիայի մոտեցումներում նկատվում է փոփոխություն. նրանք ավելի քողարկված գործունեություն են իրականացնում և արդեն ոչ թե Հայոց ցեղասպանության ժխտման քարոզարշավ են տանում, այլ առավել հանդուրժողի կեցվածք են ընդունում:

Ապրիլի 10-ին ԱՄՆ Սենատի արտաքին հարաբերությունների հանձնաժողովն ընդունել է Հայոց ցեղասպանության փաստը դատապարտող բանաձև, որի նախագիծը ներկայացրել էին հանձնաժողովի նախագահ Ռոբերտ Մենենդեսը և սենատոր Մարկ Քըրքը: Վերջին 25 տարում սա առաջին դեպքն է, երբ Սենատը նման բանաձև է ընդունում: