«Հրապարակ». ԵՊՀ-ի անվտանգության աշխատակիցներին զգուշացվել է

ԵՊՀ-ի անվտանգության աշխատակիցներին զգուշացվել է, որ ապրիլի 28-ից նրանք ստիպված են լինելու ստանալ համապատասխան ԼԵԳԻՈՆ պահնորդական ծառայության սերտիֆիկատ: Այն ստանալու համար հարկավոր են մի շարք պարտադիր թղթեր, ներառյալ' բժշկական տեղեկանքներ եւ դատվածության մասին փաստաթուղթ, սա լիցենզավորում ստանալու առաջին փուլն է, երկրորդը վերապատրաստումն է' 25 հազար դրամ վճարի դիմաց: Հետո արդեն որոշումը' նախկինի պե՞ս կաշխատեն, թե՞ ոչ։ ԵՊՀ աշխատակազմի ղեկավար Ալիկ Ղարիբյանի խոսքով, լիցենզիա տրամադրելու իմաստը աշխատանքի որակի բարձրացումն է:

«Պահակներից շատերը սիրում են պահակակետում ննջել, անծանոթ մարդկանց ներս թողնել, ովքեր դասապրոցեսը խանգարում են. այս ամենը փոխելու միակ ճանապարհը վերապատրաստման դասընթացներին մասնակցելն է»,-պարզաբանեց Ղարիբյանը։ Նոր փոփոխության իմաստը Ղարիբյանը բացատրում է հետեւյալ կերպ. «Պահակը պետք է տիրապետի նոր տեխնոլոգիաներին, իմանա, թե ինչպես են օգտվում ռացիաներից, տեսախցիկներից»։ Անվտանգությունը նոր ընկերությանը վստահելու արդյունքում գործազուրկ են դառնալու անվտանգության մոտ 70 աշխատակիցներ, ովքեր այսօր իրենց ցածր աշխատավարձով ընտանիք են պահում։ ԵՊՀ աշխատակազմի ղեկավար Ալիկ Ղարիբյանը վստահեցնում է, որ նման բան չկա իրենց մոտ, աշխատանքից որեւէ մեկը չի զրկվի։ «Պահակային ծառայության աշխատակիցներին՝ բոլորին խնդրում ենք, որ միաժամանակ ԼԵԳԻՈՆ անվտանգության ընկերությունում վերապատրաստման գնան եւ նոր մեթոդներին ծանոթանան»,-ասաց Ղարիբյանը՝ հավելելով, որ այն պահակները, ովքեր չեն ստանա լիցենզիա, չեն աշխատի։

Շարունակությունը` «Հրապարակ» օրաթերթի այսօրվա համարում: