ԼՂՀ վարչապետը «Թվիթեր» սոցիալական ցանցի փոխնախագահ Րաֆֆի Գրիգորյանին պաշտոնապես հրավիրել է Արցախ

ԼՂՀ վարչապետ Արա Հարությունյանը «Թվիթեր» սոցիալական ցանցի փոխնախագահ Րաֆֆի Գրիգորյանին պաշտոնապես հրավիրել է Արցախ: Այս մասին տեղեկանում ենք Արտակ Բեգլարյանի թվիթերյան գրառումից: Րաֆֆի Գրիգորյանը Հայաստանում է «Թումո»-ստեղծարար տեխնոլոգիաների կենտրոնում համալսարանական ուսանողների և ՏՏ ոլորտի մասնագետների համար ծրագրավորման առաջավոր դասընթաց վարելու նպատակով:

Որպես «Թվիթերի»' տեղեկատվական տեխնոլոգիաների ոլորտի առաջնորդ՝ Գրիգորյանը ղեկավարել է ընկերության ծառայությունների ինտեգրումն Apple-ի iOS մոբայլ համակարգին և օգնել ստեղծելու գեոլոկացիոն ծրագիրը: Այսօր նա ընկերությունում ղեկավարում է ավելի քան հինգ տարբեր խմբեր և պատասխանատու է սոցիալական ցանցի ծրագրային ենթակառույցների համար: Նախքան «Թվիթերին» միանալը Գրիգորյանը համահիմնադրել է WattzOn.com-ը՝ ստարտափ ընկերություն, որը Business Week ամսագիրն անվանել էր 2008թ. լավագույն գաղափար: Նա դասավանդել է Նյու Յորքի համալսարանի Ինտերակտիվ հեռահաղորդակցության բաժնում, ինչպես նաև O'Reilly Media-ի հրատարակած «TiVo Hacks» գրքի հեղինակն է և Մասաչուսեթսի տեխնոլոգիական ինստիտուտի «Մեդիա լաբի» նախկին անդամը:

Վարչապետի մամուլի քարտուղարը հույս է հայտնել, որ Րաֆֆի Գրիգորյանը կընդունի վարչապետի հրավերը, և նրա այցը նոր խթան կհանդիսանա Արցախում ՏՏ ոլորտի զարգացման համար: