«Բարի գալուստ Նյու Յորք» կինոժապավենը կցուցադրվի միայն համացանցում

Ժերար Դեպարդիեի մասնակցությամբ «Բարի գալուստ Նյու Յորք» կինոժապավենը կցուցադրեն միայն համացանցում: Այս մասին հայտարարել է ֆիլմի պրոդյուսեր Վենսան Մարավալը:

«Քանի որ Ֆրանսիայի գործող օրենսդրությունն արգելում է միաժամանակյա վարձույթ կինոդահլիճներում և այլ տեսակի դիստրիբուցիաներ, մենք ընտրեցինք համացանցը: Միևնույն ժամանակ մյուս երկրներում, մասնավորապես, ԱՄՆ-ում, «Բարի գալուստ ՆյուՅորք» ֆիլմը միաժամանակ կցուցադրվի դահլիճներում և համացանցում»,- հայտարարել է պրոդյուսերը:

Նրա խոսքով՝ կինոժապավենը, որտեղ ֆրանսիացի դերասան և Ռուսաստանի քաղաքացի Ժերար Դեպարդիեն խաղացել է Արժույթի միջազգային հիմնադրամի նախկին կարգադրիչ տնօրեն Դոմինիկ Սթրոս Կանի դերը, հնարավոր կլինի համաշխարհային ցանցում դիտել արդեն մայիսին՝ Կաննի կինոփառատոնի ժամանակ: Դիտման արժեքը կկազմի 7 եվրո:

Հիշեցնենք, որ ամերիկացի ռեժիսոր Աբել Ֆեռարան 2012 թվականի փետրվարին հայտարարել էր ԱՄՀ-ի կարգադրիչ տնօրենի մասնակցությամբ վերջին տարիների ամենաաղմկահարույց սեքսուալ սկանդալներից մեկի մոտիվներով ֆիլմ նկարահանելու մտադրության մասին:

Նյու Յորքի ոստիկանությունը Սթրոս Կանին ձերբակել է 2011 թվականի մայիսի 14-ին տեղի «Սոֆիտել» հյուրանոցի սպասուհուն բռնաբարելու կասկածանքով: 5 օր հետո նա պաշտոնաթողություն է խնդրել, հաղորդել է «Ուկրինֆորմը»: