«Հրապարակ». «Սերժ Սարգսյանը միշտ չէ, որ խոստացածն անում է»

«Հիմա ինչքան մարդու շաքարը բարձրացավ»,- ակնհայտ բավականությամբ ասում է զրուցակիցս եւ պարզաբանում՝ բոլոր նախարար-փոխնախարարները, մարզպետ-փոխմարզպետները եւ այլ տրամաչափի պաշտոնյաներ շունչները պահած սպասում են իրենց հրամաններին: «Ով ինչ ուզում է ասի՝ մինչեւ հրամանագիրը չլինի, ոչ ոք չի կարող վստահ լինել, որ նշանակվելու է»,- շարունակում է իշխանական կուլիսներում տիրող իրավիճակը նկարագրել զրուցակիցս:

Նրա պատմելով՝ Սերժ Սարգսյանը միշտ չէ, որ խոստացածն անում է, պատահում է՝ իրավիճակ է փոխվում, պատահում է՝ ինչ-որ բան են ականջին փսփսում, ինչ-որ կոմպրոմատներ են վերջին պահին դնում «դեմը»: Հայաստանում ի՞նչն է շատ՝ պալատական խարդավանքներն ու իրար տակ փորելը: Սրան պետք է գումարել նաեւ Հովիկ Աբրահամյանի, Գագիկ Ծառուկյանի եւ «մյուսների» գործոնը՝ երբ պետք է հաշվի առնել վերջիններիս արձագանքը:

Բացի այդ, ինչպես պատմում է իշխանական խոհանոցին մոտ կանգնած ինֆորմատորս, նոր երեւույթ էլ է ի հայտ եկել իշխանական բուրգում. ոմանք ուղղակի հրաժարվում են պաշտոն զբաղեցնելուց: «Վիճակն այնքան բարդ է, որ մարդիկ հասկանում են, թե ինչքան վտանգավոր է պաշտոնի գնալը՝ էլ առաջվա պես թալանելու շատ բան չկա, պատասխանատվությունը մեծ է, փող աշխատելու հնարավորությունները՝ փոքր, եւ նրանք, ովքեր ամբողջ կյանքում երազել են մի տաքուկ տեղում հայտնվելու մասին, այսօր կասկածում են՝ համաձայնե՞լ, թե՞ ոչ»: Եթե անգամ այս ամենը չափազանցություն է, ապա ակնհայտ է, որ բոլոր ոլորտներում կա կադրերի դեֆիցիտ եւ ամենուրեք՝ պրոֆեսիոնալների պակաս: Այս պարագայում շատ դժվար խնդիր է դրված Սերժ Սարգսյանի առաջ՝ գտնել կադրեր, որոնք կլինեն իրեն հավատարիմ, կունենան աշխատանքի փորձ եւ էլ ավելի ծանր դրության մեջ չեն դնի իրենց նշանակողին:

Շարունակությունը` «Հրապարակ» օրաթերթի այսօրվա համարում: