ՀՅԴ Հայ դատի պատասխանատուն հայ-թուրքական արձանագրություններից ձերբազատվելու կոչ է անում

Մինչև Հայոց ցեղասպանության հարյուրամյա տարելիցը Հայաստանը պետք է ձերբազատվի հայ-թուրքական արձանագրություններից և Ցեղասպանության միջազգային ճանաչման գործընթացը շարունակի առանց այդ փաստաթղթղերի: Տեսակետը ՀՅԴ Հայ դատի և քաղաքական հարցերի պատասխանատու Կիրո Մանոյանինն է: Ապրիլի 22-ին լրագրողների հետ հանդիպման ժամանակ Մանոյանը, անդրադառնալով արձանագրություններին, նշեց, որ դրանք իրականում ոչ մի դրական հետք չթողեցին գործընթացի վրա, մինչդեռ բացասականն ակնհայտ էր: Հայոց ցեղասպանության 100-ամյա տարելիցին ընդառաջ, Մանոյանը նշեց, որ երկու պետությունների հարաբերությունների կարգավորման որևէ հիմք չկա: «2015թ. որոշակի փոփոխություններ կլինեն, գուցե թուրք հասարակության մի մասը սկսի ճանաչել սեփական պատմությունը, քանի որ նրանք էլ են Ցեղասպանության զոհեր, սակայն լուրջ փոփոխություններ և զարգացումներ չեմ ակնկալում»,- ասաց Մանոյանը: Անդրադառնալով Պաշտպանության նախարարությունում հայ-թուրքական արձանագրությունների վերաբերյալ ՀՀ նախագահ Սերժ Սարգսյանի հայտարարությանը, Մանոյանը նշեց, որ համամիտ չէ նախագահի հետ և կարծում է, որ հայ-թուրքական արձանագրությունները կարողացան բացասական ազդեցություն ունենալ Հայոց ցեղասպանության միջազգային ճանաչման գործընթացի վրա: «Հարկ է նշել, որ հայ-թուրքական արձանագրությունների ստորագրումից հետո ընդամենը մեկ երկիր' Շվեդիան է ճանաչել այն: Այն նաև լուրջ ազդեցություն ունեցավ ԼՂ հակամարտության կարգավորման առնչությամբ, քանի որ այժմ արևմտյան պետություններն առավել հաճախ են խոսում, որ Թուրքիան պետք է մտնի բանակցային գործընթացի մեջ»,- ասաց Մանոյանը:

Անդրադառնալով Հայաստանում ԱՄՆ դեսպան Ջոն Հեֆֆերնի հայտարարությանը, որ Բարաք Օբամայի այս տարվա ապրիլքսանչորսյան ուղերձն ավելի ուժեղ է լինելու, Մանոյանը թերահավատություն հայտնեց' նշելով, որ ուժեղ հայտարարության վերաբերյալ նախօրոք չեն հայտնում' այդ կերպ տուրք տալով թուրքական քարոզչությանը: