Հայ-թուրքական արձանագրություններն արժեք չունեն. Գագիկ Հարությունյան

Նախորդ տարիների օրինակով այս անգամ ևս ապրիլի 24-ին ԱՄՆ նախագահ Բարաք Օբաման երկիմաստ հայտարարություն կանի, որը գուցե չի լինի բացասական, սակայն չի էլ արտահայտի պատմական ճշմարտությունը: «Նորավանք» հիմնադրամի տնօրեն Գագիկ Հարությունյանի գնահատմամբ, թուրք-ամերիկյան հարաբերությունները շատ սերտ են, և բոլոր ոլորտներում էլ նկատվում է ջերմացում: Հենց այդ համատեքստում է վերլուծաբանն առաջարկում ուսումնասիրել Օբամայի ելույթը, նաև հասկանալ ԱՄՆ-ի դիրքորոշումը:

Ապրիլի 22-ին լրագրողների հետ հանդիպման ժամանակ Հարությունյանը հիշեցրեց, որ հենց թուրք-ամերիկյան հարաբերություններն էին պատճառը, որ ՄԱԿ-ում Քեսաբի հարցում քննարկումներ չեղան:

Հարությունյանը` անդրադառնալով հայ-թուրքական արձանագրություններին, նշեց, որ դրանք որևէ կերպ չեն խոչընդոտում Հայոց ցեղասպանության միջազգային ճանաչմանը կամ չեն կարող խանգարել Ցեղասպանության 100-ամյա տարելիցի միջոցառումներին և դատապարտող հայտարարություններին: Հայ-թուրքական արձանագրությունների առնչությամբ նա հիշեցրեց Ֆրանսիայի նախագահ Շառլ Դը Գոլի խոսքերը, որ փաստաթղթերը կանանց և ծաղիկների պես շատ շուտ թառամում են: Նրա գնահատմամբ` հայ-թուրքական արձանագրություններն էլ վերոնշյալ փաստաթղթղերի շարքին է պատկանում: «Եթե փաստաթուղթը ոչինչ չի նշանակում, այն չի կարող ազդեցություն ունենալ: Հայ-թուրքական արձանագրություններն արժեք չունեն»,- ասաց Հարությունյանը: