Կորած մալայզիական Boeing-ը կորոնեն «Տիտանիկի» օրինակով

Ավստրալիայի իշխանությունները պատրաստվում են մալայզիական կորած Boeing 777-200-ի որոնման համար ուղարկել ավելի հզոր հիդրոլոկատոր: Այդ մասին գրել է The Guardian-ը:

Bluefin 21 ստորջրյա ապարատն արդեն հետազոտել է Ավստրալիայի արևմտյան ափի որոնման գոտու ավելի քան 80 տոկոսը, որտեղ գրանցվել են այն ռադիոազդանշանները, որոնք, ենթադրաբար, ուղարկվել են կորած ինքնաթիռի «սև արկղերից» մեկից, բայց Boeing-ն այդպես էլ չի գտնվել:

Ավստրալիայի պաշտպանության նախարար Դևիդ Ջոնսթոնը հայտարարել է, որ որոնումների համար կարող է օգտագործվել ավելի հզոր հիդրոլոկատոր՝ նման այն հիդրոլոկատորին, որը 1985 թվականին Ատլանտյան օվկիանոսի հատակին գտավ «Տիտանիկը»:

«Հաջորդ քայլը, կարծում եմ, կլինի, ավելի հզոր հիդրոլոկատորի օգտագործումը, որը կարող է աշխատել մեծ խորության վրա»,-ասել է Ջոնսթոնը:

Ավստրալիան արդեն Մալայզիայի, Չինաստանի և ԱՄՆ-ի հետ կոնսուլտացիաներ է վարել մարտի սկզբին կորած ինքնաթիռի որոնումների հաջորդ փուլի շուրջը, հաղորդել է ՌԻԱ Նովոստի գործակալությունը: