ԿԺԴՀ-ն ցավակցություն է հայտնել Հարավային Կորեային «Սևոլ» լաստանավի խորտակման կապակցությամբ

ԿԺԴՀ-ն ապրիլի 23-ին ցավակցություն է հայտնել Կորեայի Հանրապետությանը (ԿՀ) «Սևոլ» ուղևորատար լաստանավի խորտակման կապակցությամբ, որը հանգեցրել է մեծաթիվ մարդկային զոհերի, ներառյալ դպրոցականներ:

Ինչպես տեղեկացնում է Կորեայի կենտրոնական հեռագրական գործակալությունը, ցավակցությունը հարավկորեական կողմին է փոխանցվել ԿԺԴՀ-ի Կարմիր խաչի կազմակերպության կապուղիներով:

«Սևոլ» մարդատար նավը, որի վրա եղել է 476 մարդ, խորտակվել է ապրիլի 16-ին: Որոնողա-փրկարարական գործողություններին մասնակցում են Հարավային Կորեայի առափնյա պահպանության և նավատորմի 212 նավեր, գործի է դրված 550 փրկարար:

Ապրիլի 23-ին Հարավային Կորեայի առափնյա պահպանության տեղական շտաբի ներկայացուցիչները հայտնել են, որ «Սևոլ» լաստանավի խորտակման զոհերի թիվն անցած գիշերվա ընթացքում հասել է 150-ի: Ստորջրյա աշխատանքների ընթացքում փրկարարները երկրորդ օրն անընդմեջ օգտագործում են հեռակառավարվող ռոբոտներ: Հիմնական ջանքերն այժմ կենտրոնացված են երրորդ և չորրորդ տախտակամածների նավախցերի, ինչպես նաև երրորդ տախտակամածում գտնվող սրճարանի վրա:

Հանրապետության կառավարությունն այսօր հայտնել է, որ լաստանավի խորտակման հետևանքով զոհվածների ընտանիքները փոխհատուցում կստանան 260 մլն վոնի (250 հազար դոլարի) չափով, հաղորդել է ԻՏԱՌ-ՏԱՍՍ-ը: