Սնոուդենն ստանձնեց Գլազգոյի համալսարանի ռեկտորի պաշտոնը

ԱՄՆ-ի Ազգային անվտանգության գործակալության (ԱԱԳ) նախկին աշխատակից Էդվարդ Սնոուդենը, որը ժամանակավոր ապաստան է ստացել Ռուսաստանում, ապրիլի 23-ին պաշտոնապես զբաղեցրել է Գլազգոյի համալսարանի ռեկտորի պաշտոնը: Այդ մասին ասված է Թվիթերում այդ ուսումնական հաստատության էջում հրապարակված հաղորդագրության մեջ:

Սնոուդենն ինքը հանդիսավոր արարողությանը մասնակցել է տեսակապի միջոցով: Նա, մասնավորապես, շնորհակալություն է հայտնել ուսանողներին Համալսարանի ռեկտոր ընտրելու համար, ինչպես նաև ներողություն է խնդրել այն բանի համար, որ ֆիզիկապես չի կարող ներկա լինել արարողությանը: «Ես կասեի, որ ինձ համար մեծ պատիվ է այսօր տեղի ունեցած արարողության մասնակիցը լինել»,-ուսանողներին հայտնել է Սնոուդենը հեռուստակամուրջի ընթացքում:

Սնոուդենը Շոտլանդիայի Գլազգոյի համալսարանի ռեկտոր էր ընտրվել փետրվարի 18-ին: Համալսարանին առընթեր դատարանի քարտուղար Դևիդ Նյուուոլը հայտարարել է, որ ռեկտորի ընտրություններին ուսանողների մասնակցությունն այս անգամ անչափ բարձր է եղել: Համալսարանի նախկին ռեկտոր Չառլզ Քենեդին, որն այդ պաշտոնը վարել է երկու ժամկետ, իր հետնորդին հաջողություն է մաղթել գործունեության մեջ:

Գլազգոյի համալսարանի ռեկտորի պաշտոնն այդ բուհի ամենաբարձր պաշտոններից մեկն է: Նրա խնդիրն է՝ աշխատել ուսանողական խորհրդի հետ, ուսանողների շահերը ներկայացնել համալսարանի վարչակազմին և բարձրացնել նրանց անհանգստացնող հարցերը: Այս ուսումնական հաստատության ռեկտորն ուսանողների կողմից ընտրվում է երեք տարի ժամկետով, հաղորդել է «Ինտերֆաքսը»: