«Հրապարակ». Հովիկ Աբրահամյանի սլացքը դեպի վարչապետական աթոռ ապշեցուցիչ է

Հովիկ Աբրահամյանի սլացքը դեպի վարչապետական աթոռ ապշեցուցիչ է: Երեկ վարչապետի պաշտոնում նրա երկրորդ արարն էր. նիստը նա սկսեց ճիշտ Տիգրան Սարգսյանի կեցվածքով՝ իր մտքերի ու անելիքների մասին խոսելով առաջին դեմքով, ճիշտ այնպես, ինչպես, եթե ինքը գրեր, շարադրեր սեփական տեսակետն ու անձամբ տեղադրեր կառավարության կայքում: Նիստը սկսեց կուտակային կենսաթոշակային համակարգի վերաբերյալ տեղեկատվությամբ. «Այսօր ես իմ դիրքորոշումը, մտահոգությունները, պատկերացումները տեղադրել եմ կառավարության կայքում, հանդես եմ եկել ուղերձով, որտեղ շատ հստակ ներկայացված են կառավարության դիրքորոշումները: Խնդրում եմ ծանոթանալ»:

Այսպիսի ինքնավստահությամբ գործընկերների հետ շփվում էր Տիգրան Սարգսյանը, եւ ոչ մեկը կասկածի տակ չէր դնում, որ նա ուղերձ է գրել, դիրքորոշում ձեւակերպել ու անձամբ այն տեղադրել կայքում: Տպավորություն է, որ Հովիկ Աբրահամյանին ու իր շրջապատին այս ամենը սկսել է դուր գալ, եւ չի բացառվում, որ իր նախորդից հետ չմնալու համար շուտով նա Ֆեյսբուքում անձնական էջ բացի, կսկսի բարձրաճաշակ երաժշտություն լսել, որեւէ գործիքի վրա նվագել, օտար լեզուներ սերտել, գրքեր կարդալ եւ հովանավորել ինտելեկտուալ խաղեր:
Երեկվա մյուս հաջողությունն էլ այն էր, որ կառավարության շենքի առջեւ ոչ մեկը սցենար չբեմադրեց, մուկ, կատու կամ այլ ընտանի կենդանիներ չբերեցին: Անգամ ոստիկաններ չկային շենքի տարածքում, որի գլխավոր պատճառը թերեւս այն էր, որ նիստի օրը տեղափոխվել էր, եւ շատերը չգիտեին դրա մասին: Իսկ նոր ձեւավորվող կառավարությունում դեռ տագնապալի վիճակ է՝ հներն ամեն գնով խուսափում էին լրագրողներից ու անհետանում կառավարության շենքի գաղտնուղիներով, նորանշանակները հպարտ դուրս էին գալիս մեջլիս:

Շարունակությունը` «Հրապարակ» օրաթերթի այսօրվա համարում: