Հայաստանում Հայոց ցեղասպանությունը վերապրողի կենսաթոշակ է ստանում 39 անձ

ՀՀ աշխատանքի և սոցիալական հարցերի նախարարության սոցիալական ապահովության պետական ծառայությունում կենսաթոշակ է ստանում ցեղասպանություն վերապրած 39 կենսաթոշակառու: ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետի մամուլի քարտուղար Արամայիս Շահբեկյանն տեղեկացրեց, որ մարտի տվյալների համաձայն' Հայաստանում կենսաթոշակ է ստանում Օսմանյան Թուրքիայի կողմից իրականացված Հայոց ցեղասպանությունը վերապրած 39 անձ, նրանցից 25-ը կին է, 14-ը տղամարդ:

Շահբեկյանը նշեց, որ բացառված չէ, որ Հայաստանի տարածքում լինեն անձինք, ովքեր չեն ստանում կենսաթոշակ, սակայն նույնպես ցեղապանությունը վերապրած են: Դրանցից մեկը' Արմավիրի մարզի Պտղունք գյուղում բնակվող 1910 թվականին ծնված Խաչիկ Պեպիսյանն է:

Համաձայն «Արմենպրես» լրատվական գործակալության Հայոց ցեղասպանության «Ականատես»-ը հատուկ նախագծի մեկամյա գործունեության արդյունքում ստացված տեղեկատվության' Արմավիրի մարզում ցեղասպանությունը վերարապրածների թիվն ամենից շատն է, իսկ ճնշող մեծամասնության հայրենիքը պատմական Մուսա լեռն է: Երևանում բնակվում է ցեղասպանությունը վերապրած տասը անձ:

2011 թվականի տվյալներով' Հայաստանի Հանրապետությունում բնակվում էր 1915 թվականին Օսմանյան Թուրքիայի կողմից իրականացված Հայոց ցեղասպանությունը վերապրած 141 անձ: Նրանցից 109-ը կին էր, 32-ը' տղամարդ: Դրանից երեք տարի առաջ հանրապետությունում Հայոց ցեղասպանությունը վերապրածների թիվը 250 էր: