Հայաստանի ծանրամարտի երիտասարդական առաջնության չեմպիոնները հայտնի են

Երևանի սպորտի պետական քոլեջի սրահում որոշվել են ծանրամարտի Հայաստանի երիտասարդական առաջնության չեմպիոնները:

56կգ քաշային կարգում լավագույնն է դարձել Դավիթ Դավոյանը' ցույց տալով 220կգ արդյունք երկամարտում:

62 կգ քաշայինների մրցապայքարում երկամարտի 255կգ արդյունքով չեմպիոնի կոչումը նվաճեց Գևորգ Բաղդասարյանը:

69 կգ քաշային կարգում Եվրոպայի չեմպիոն Վարդան Միլիտոսյանը դարձավ Հայաստանի չեմպիոն միայն լրացուցիչ չափանիշով: Նա ցույց տվեց 285կգ արդյունք և իր մրցակցին շրջանցեց միայն ավելի թեթև անձնական քաշ ունենալու շնորհիվ:

77կգ քաշային կարգում հաղթեց Ռազմիկ Օլթեցյանը' երկամարտի 300կգ արդյունքով:

85կգ քաշային կարգում հաղթեց Կարեն Պեպանյանը' երկամարտում բարձացնելով 287կգ:

105կգ քաշային կարգում իրեն հավասարը չունեցավ Մկրտիչ Մկրտչյանը' ցույց տալով 330կգ արդյունք երկամարտում(150կգ՝ պոկում և 180կգ՝ հրում վարժություններում):

105կգ ավելի քաշային կարգում հաղթող դարձավ Արեն Հարությունյանը՝ 325կգ(145կգ՝ պոկում և 180կգ հրում վարժություններում):

Մրցաշարին մասնակցեցին շուրջ 120 մարզիկներ, այն անցկացվեց Երևանի պետական մարզական քոլեջի սրահում:

Առաջնության արդյունքներով՝ Հայաստանի ծանրամարտի երիտասարդական հավաքականի գլխավոր մարզիչ Մելիք Ղուկասյանը կձևավորի մեր թիմի կազմը, որը կմասնակցի հունիսի 24-28-ը Ռուսաստանի Դաշնության Կազան քաղաքում կայանալիք ծանրամարտի աշխարհի երիտասարդական առաջնությանը: