Սերժ Սարգսյանը՝ բարձրաստիճան պաշտոնյաների ուղեկցությամբ, հարգանքի տուրք մատուցեց Ցեղասպանության զոհերի հիշատակին (լուսանկարներ)

Նախագահ Սերժ Սարգսյանն այսօր՝ 24-ին, տիկնոջ Ռիտա Սարգսյանի հետ Ծիծեռնակաբերդի հուշահամալիրում հարգեց Հայոց ցեղասպանության զոհերի հիշատակը:

Սերժ Սարգսյանին ուղեկցում էին նաև բարձրաստիճան միշարք պաշտոնյաներ, որոնց թվում ՀՀ նորանշանակ վարչապետ Հովիկ Աբրահամյանը, Ազգային ժողովի խոսնակի պաշտոնակատար Էդուարդ Շարմազանովը, Զինված ուժերի բարձրագույն սպայակազմը, մի շարք նախարարներ, նախարարների պաշտոնակատարներ, Հայաստանում հավատարմագրված դիվանագիտական ներկայացուցչությունների ղեկավարներ, հայրենակցական միությունների, հասարակական կազմակերպությունների անդամներ:

Ն.Ս. Օ. Տ. Տ. Գարեգին Բ Ամենայն Հայոց Կաթողիկոս աղոթք կարդաց Հայոց ցեղասպանության անմեղ զոհերի հիշատակին: 

Հիշեցնենք, որ Սերժ Սարգսյանը Ցեղասպանության զոհերի հիշատակի օրվա կապակցությամբ հղած ուղերձում նշել էր, որ մեկուկես միլիոն հայորդիներ զոհ դարձան մի այնպիսի հանցագործության, որն այն ժամանակ դեռ անուն չուներ: Մարդկային որևէ լեզու դեռ չէր հորինել նման արտահայտություն կամ բառեզր: Նրանք զոհվեցին պարզապես նրա համար, որ հայ էին: Նախօրոք և մանրամասնորեն ծրագրված ոճրագործությունն ուներ հստակ նպատակ. բնաջնջելով ժողովրդին՝ տիրանալ նրա բնօրրան-երկրին, նրա ունեցվածքին և հազարամյակների ժառանգությանը: Այսպիսով իրականացվում էր հայությանը, որպես քաղաքական գործոն, պատմության թատերաբեմից ընդմիշտ վերացնելու հրեշավոր նախագիծը: