Էրդողանը հնարավորություն ուներ ճանաչել Ցեղասպանությունը, բայց չարեց. Խաչիկ Ասրյան

Թուրքիան, ի դեմս վարչապետ Էրդողանի, գնում է մի ճանապարհով, որը կարող ենք վստահ անվանել սուլթանիզմ: Այս մասին ասաց ՀՀ սպորտի և երիտասարդության հարցերի փոխնախարար, «Հայոց Արծիվներ» հայրենասիրական հասարակական կազմակերպության նախագահ Խաչիկ Ասրյանը' անդրադառնալով Թուրքիայի վարչապետ Էրդողանի հայտարարությանը Հայոց ցեղասպանության վերաբերյալ:

«Էրդողանն անցած տարիներին հնարավորություն ուներ Հայոց ցեղասպանությունը ճանաչել, սակյան նա դա չարեց և այսօր' 100-ամյա տարելիցի շեմին, հանդես է գալիս հայտարարությամբ»,- ասաց Ասրյանը:

Նա նշեց, որ իր' որպես ՀՀ քաղաքացու համար ընդունելի չէ Էրդողանի հայտարարությունը:

Խաչիկ Ասրյանը կոչով դիմեց Արցախյան հերոսամարտ անցած հայ ժողովրդին: «Միշտ եղեք գոտեպնդված, եղեք ուժեղ, գիտակցեք մեր աշխարհագրական դիրքը, գիտակցեք սուլթանիզմի ճանապարհով ընթացող Թուրքիայի ղեկավարների մտահղացումները և նրանց ոչ ժողովրդավար մոտեցումը' հայերիս և Հայաստանի հանդեպ: Հայ ժողովուրդը պետք է համախմբված լինի ազգային բանակի, ՀՀ նախագահի և հայոց պետականության շուրջը' կերտելով մեծ և հզոր քրիստոնյա Հայաստան: Սա է մեր միակ փրկությունը»,-ասաց Ասրյանը:

Ապրիլի 24-ին հիշատակի արարողություններ են կատարվում Հայաստանի բոլոր շրջաններում, աշխարհի տարբեր երկրների հայկական համայնքներում: Բողոքի կոչ է բարձրացվում Թուրքիայի մերժողական քաղաքականության դեմ և ուղերձ հղվում միջազգային հանրությանը' ճանաչել 20-րդ դարասկզբի մեծագույն ոճրագործությունը' դրանով թույլ չտալով ցեղասպանությունների կրկնություն: