Թուրքիան տարածաշրջանային խնդիրները լուծելու մեկ ճանապարհ ունի՝ ճանաչել Հայոց ցեղասպանությունը. Նաիրա Զոհրաբյան

Հայաստանը պետք է կարողանա հասնել նրան, որ գերտերությունները Թուրքիայի հետ իրենց հարաբերությունների շահը չդարձնեն քաղաքական խաղի կանոն: Լրագրողների հետ զրույցում նման դիտարկում արեց «Բարգավաճ Հայաստան» խմբակցության պատգամավոր, Եվրոպայի խորհրդի խորհրդարանական վեհաժողովում հայաստանյան պատվիրակության անդամ Նաիրա Զոհրաբյանը:

«Այստեղ մեծ անելիք ունենք յուրաքանչյուրս՝ ճիշտ համադրելով նաև սփյուռքի ներուժը: Չկա որևէ քաղաքական գործիչ, այդ թվում նաև ԱՄՆ նախագահ Օբաման, որն իր հոգու խորքում չի ընդունում Հայոց ցեղասպանության փաստը: Բայց մենք հասկանում ենք, որ կա նաև իրական քաղաքականություն: Մեր խնդիրը պետք է լինի նաև այն, որ պատմական, բարոյական, իրական ճշմարտությունը վեր լինի իրական քաղաքականությունից, օրվա գերտերությունների քաղաքական օրակարգի շահերից»,- ասաց Զոհրաբյանը:

Պատգամավորի խոսքով՝ Թուրքիայի «Զրո խնդիր հարևանների հետ» սկզբունքն ուղղակի դեմագոգիկ հայտարարություն է: Զոհրաբյանի դիտարկմամբ, հայոց ցեղասպանության վերաբերյալ Թուրքիայի վարչապետ Էրդողանի հայտարարությունը զոհին և դահճին նույն հարթության վրա դնելու փորձ էր: Միաժամանակ, Զոհրաբյանի կարծիքով, չի գտնվի որևէ լուրջ երկիր, որ չհասկանա Թուրքիայի՝ Հայաստանի հետ բարիդրացիական հարաբերություններ ստեղծելու իմիտացիան փորձերը: «Պատմական արդարությունը չվերականգնված' չի կարող որևէ խնդիր լուծվել: Թուրքիան մեկ ճանապարհ ունի լուծելու տարածաշրջանային խնդիրները՝ ճանաչել Հայոց ցեղասպանությունը: Գերմանիան՝ ճանաչելով Հոլոքոստը, ավելի թույլ պետություն չդարձավ, ընդհակառակը' դարձավ ուժեղ, հավաստեց և հաստատեց, որ իրավունք ունի աշխարհի առաջատար պետությունների շարքում ունենալ իր տեղը»,- նկատեց Զոհրաբյանը: