ԱՀԿ պետգնումների համաձայագիրը չի հակասում Մաքսային միության համաձայնագրի դրույթներին

Հայաստանը մինչ տարեվերջ կստորագրի Մաքսային միության տարածքում գործող պետգնումների համաձայնագիրը, իսկ մինչ այդ ուսումնասիրվում է Առևտրի համաշխարհային կազմակերպության Պետական գնումների վերանայված համաձայնագիրը՝ հետագայում այն ևս վավերացնելու համար։ Լրագրողների հետ զրույցում Ֆինանսների նախարարության պետական ներքին ֆինանսական հսկողության և պետական գնումների մեթոդաբանության վարչություն պետ Մակար Ղամբարյանը տեղեկացրեց, որ այդ երկու համաձայնագրերը չեն հակասում միմյանց, սակայն դեռևս կան դրույթներ, որ պետք է քննարկվեն։ «Նախ և առաջ պետք է համեմատական անցկացնել գնումների համակարգի ԱՀԿ նոր համաձայնագրի և Հայաստանի օրենսդրական դաշտի հետ՝ գտնելով այն դրույթները, որոնք փոփոխման ենթակա են։ Այս տարվա ընթացքում փոփոխության կենթարկվի «Պետական գնումների մասին» օրենքը՝ համապատասխանեցվելով ԱՀԿ համաձայնագրի տեքստին և Մաքսային միության դրույթներին։ Երկու համաձայանագրերում անհամաձայնություններ չկան, սակայն կան կետեր, որոնք պետք է քննարկվեն։ Այս ողջ գործընթացը պատրաստվում ենք իրականացնել մինչ տարեվերջ»,- ասաց Ղամբարյանը։ Նրա խոսքով` Հայաստանի համար առաջնայինը Մաքսային միության համաձայնագիրն է, սակայն ԱՀԿ համաձայնագրին միանալը ևս ունի իր դրական կողմերը:

«Համաձայնագիրը հնարավորություն է տալիս, որ այլ երկրները ևս մասնակցեն Հայաստանի պետգնումներին: Հայաստանի պետգնումների համակարգում այդ մասնակցությունն այնքան էլ մեծ չէ։ Դա պայմանավորված է նրանով, որ Հայաստանում պետգնումների ծավալները փոքր են՝ այլ պետությունների հետ համեմատած։ 2011 թվականի մայիսին Հայաստանը դարձավ ԱՊՀ երկրներից միակը, որ միացավ ԱՀԿ պետական գնումների համաձայնագրին։ Այս համաձայնությունը հնարավորություն ստեղծեց տնտեսության զարգացման համար, և ներկայումս մեր մատակարարները հնարավորութ յուն ունեն մասնակցելու համաձայնագրի անդամ 41 երկրների գնումների գործընթացին։ Հայաստանը պարտավորվել է նաև իրականացնել վերանայված համաձայնագիրը, որն ընդունվել է 2012 թվականի մարտին»,-տեղեկացրեց Ֆինանսների նախարարության պետական ներքին ֆինանսական հսկողության և պետական գնումների մեթոդաբանության վարչություն պետը: