Ավելի տրամաբանական կլիներ, եթե կուտակային կենսաթոշակների մասին օրենքից դժգոհություններն ավելի վաղ լինեին. Գագիկ Մինասյան

Կուտակային կենսաթոշակների մասին օրենքն ընդունվել է 3 տարի առաջ, և այն ժամանակ ներկայիս ընդվզումներն օրենքի հետ կապված չկային: Այս մասին ապրիլի 25-ին լրագրողների հետ հանդիպմանն ասաց ԱԺ ՀՀԿ խմբակցության պատգամավոր, ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը: «Եթե օրենքի վերաբերյալ հասարակական ընդվզումները լինեին 1 տարի կամ երեք տարի առաջ, զարգացումներն ավելի տրամաբանական հունով կընթանային»,- ասաց Մինասյանը:

Նա նշեց, որ պատահական չի եղել, որ օրենքն ընդունվել է գրեթե 3.5 տարի առաջ, իսկ այն ուժի մեջ պետք է մտներ միայն 2014թ. հունվարի 1-ից: «Այդ երեք տարի ժամանակը տրված էր նրա համար, որպեսզի հասարակության տարբեր շերտերը մանրամասն ուսումնասիրելով այդ օրենքի առանձնահատկությունները' ներկայացնեին իրենց դիրքորոշումը, անհամաձայնություններն այս օրենսդրական փաթեթի հետ»,- ասաց նա:

Մինասյանի կարծիքով` օրենքի քննարկումների համար ժամանակի տրամադրումը չափազանց կարևոր է, քանի որ կենսաթոշակային բարեփոխումները յուրաքանչյուր երկրի համար ամենաբարդ բարեփոխումներն են: «Հենց այդ երեք տարին մենք տրամադրեցինք նրա համար, որ քաղաքացիական հասարակության քննարկումների արդյունքում առաջ եկած դժգոհությունները և անհամաձայնությունները հաշվի առնելով, մենք դեռևս չգործող օրենքը բերեինք այն տեսքին, որն ընդունելի կլիներ հասարակության ավելի լայն շերտերի համար»,- ասաց Մինասյանը՝ ընդգծելով, որ դա տեղի ունեցավ միայն այն ժամանակ, երբ արդեն մոտենում էր օրենքի կիրառման պահը:

Մինասյանը հիշեցրեց, որ առաջիկա լիագումար նիստում պետք է քննարկվի կառավարության կողմից ներկայացված նախագիծը, որով առաջարկվում է կուտակային կենսաթոշակների մասին օրենքում փոփոխություններ կատարել և մինչև սեպտեմբերի 30-ը կասեցնել տույժերի հաշվարկը, իսկ հետագայում արդեն ևս լրացումներ կկատարվեն օրենքում, որպեսզի այն ամբողջապես համապատասխանի Սահմանադրական դատարաննի որոշմանը և ընդունելի լինի հասարակության լայն շերտերի համար: