Արթուր Բաղդասարյանը կղեկավարի ՀԱՊԿ ակադեմիան

Ազգային անվտանգության խորհրդի քարտուղարի պաշտոնից հրաժարվելուց հետո «Օրինաց երկիր» կուսակցության նախագահ Արթուր Բաղդասարյանն անգործ չի մնացել: Նրան առաջարկել են ղեկավարել Երևանում բացվելիք ՀԱՊԿ ակադեմիան, որը լինելու է միջազգային մակարդակի հաստատություն: Ապրիլի 25-ին լրագրողների հետ կայացած հանդիպման ժամանակ Բաղդասարյանն ասաց, որ նոր աշխատավայրում էլ կփորձի ամեն ինչ անել հանուն երկրի անվտանգության:

Բաղդասարյանի գնահատմամբ, իր քաղաքական հայացքներն ու ընդդիմադիր կուսակցություն ղեկավարելը որեւէ ազդեցություն չեն ունենա նոր պաշտոնում նոր կառույցը ղեկավարելիս, և նա այդ պարագայում ավելի բարձր կդասի պետության շահը:

Բաղդասարյանը խոստովանեց, որ հաջորդ շաբաթ կհեռանա Ազգային անվտանգության խորհրդի շենքից: Մինչ այդ, նա հրաժարականի դիմում կներկայացնի ՀՀ Նախագահ Սերժ Սարգսյանին, իսկ հետո հանդիպումներ կունենա նաեւ աշխատակազմի հետ: Աշխատավայրի փոփոխություններն ու կոալիցիայից դուրս գալը ազդեցություն կունենան նաեւ ՕԵԿ ղեկավարի ընտանիքի կենսակերպի վրա: Նրա 6 հոգանոց ընտանիքը հատկացված պաշտոնական առանձնատնից կհեռանա եւ կապրի 3 սենյականոց բնակարանում: Բաղդասարյանը հավաստիացնում է, որ թեʹ պետական առանձնատանը, թեʹ իր երեք սենյականոց բնակարանում պայմանանները միջինից էլ ցածր են: Ինքը դղյակներ չունի, ինչպես հաճախ են հայտարարում մամուլում, սակայն որոշ ժամանակ հանգստանալուց հետո մտադիր է առանձնատուն կառուցել: Ըստ նրա'այն դղյակ չի լինի, սակայն իր հարմարավետությամբ ավելի լավը կլինի, քան բազմաբնակարան շենքի բնակարանը: Թեպետ Բաղդասարյանը դղյակ չունի, սակայն խոստովանում է, որ ունի բիզնես: «Այո, խոստովանում եմ` «Հայասի» ընկերությունը պատկանում է ինձ: Այն ես եմ ստեղծել, կոպեկներով չեմ սեփականաշնորհել, այլ քարը քարի վրա դնելով ստեղծել եմ այդ ընկերությունը»,- ասաց Բաղդասարյանը` հավելելով, որ ընկերությունը կառուցել են բանկից վերցրած վարկով եւ մինչեւ հիմա էլ բանկերում դեռ վարկեր ունեն: Մնացյալ բիզնեսների եւ տների կապակցությամբ, որոնք, ըստ շրջանառվող լուրերի, պատկանում են Բաղդասարյանին, բայց գրանցված են եղբոր անունով, ՕԵԿ առաջնորդն ասաց, որ իր եղբայրն իր հետ կապ չունի: «Նա 45 տարեկան է եւ երիտասարդության տարիներից սիրել է բիզնեսով զբաղվել: Երեւանում է զբաղվել, Մոսկվայում: Դա իր բիզնեսն է եւ ես դրա հետ կապ չունեմ: Ես բարոյական մարդ եմ եւ ասում եմ, որ ունեմ մեկ բիզնես` «Հայ ասի» ընկերությունը»,- ասաց Արթուր Բաղդասարյանը: