Զբոսաշրջության մասնագետը կարևորում է կազմակերպված զբոսաշրջային հոսքերի ուղղորդումը Հայաստան

Հայաստանում զբոսաշրջային ոլորտի հետագա զարգացման համար կարևոր է ընտրել այն երկրները, որոնք յուրաքանչյուր տարի Հայաստան «կմատակարարեն» հստակ թվով զբոսաշրջիկներ, այսինքն կապահովեն կազմակերպված զբոսաշրջային հոսք դեպի Հայաստան։ Աշխարհում այս մեխանիզմը դարձել է առաջնային, և շատ պետություններ ունեն այն դոնոր երկրները, որոնք մշտապես նրանց ապահովում են զբոսաշրջիկներով։ «Արմենպրես»-ի հետ զրույցում Տուրիզմի հայկական ինստիտուտի ռեկտոր Ռոբերտ Մինասյանը նշեց, որ այդ մեխանիզմով աշխատելու պարագայում հնարավոր է զգալիորեն ավելացնել Հայաստան այցելող զբոսաշրջիկների թիվը։ «Մենք չենք կարող մեզ թույլ տալ ավելորդ ռեսուրսներ ծախսել այն երկրների վրա, որտեղից Հայաստան են գալիս միայն հաշված թվով զբոսաշրջիկներ, մինչդեռ այլ պետություններից եկող զբոսաշրջիկների թիվը մի քանի հազար է։ Հայաստանի համար զբոսաշրջիկ մատակարարող պետություններ կարող են դառնալ Ռուսաստանը, Իտալիան, Գերմանիան, Ֆրանսիան, Իրանը։ Կազմակերպված զբոսաշրջային հոսքերը կնպաստեն նաև նրան, որ յուրաքանչյուր տարի մեր ՀՆԱ-ի որոշակի մասը կձևավորվի զբոսաշրջության ոլորտից ստացված հասույթով, որն էլ հնարավորություն կտա, որ պետությունն ավելի մեծ ներդրումներ անի ոլորտում և գումարներ հատկացնի նաև պրոպագանդայի համար»,-նշեց Մինասյանը։

Մասնագետի խոսքով` այստեղ մեծ անելիք ունեն զբոսաշրջային կազմակերպությունները, քանի որ նրանք պետք է կարողանան օգտագործել ցուցահանդեսները, փառատոններն ու զբոսաշրջային այլ միջոցառումները՝ ներկայացնելու իրենց առաջարկները և զբոսաշրջային նոր հոսքեր ներգրավելու։ «Մենք մի հստակ բան պետք է տարբերենք, որ զբոսաշրջային կազմակերպությունը, մասնակցելով այդ միջոցառումներին, Հայաստանը չպետք է գովազդի, այլ պետք է գովազդի իր զբոսաշրջային ապրանքը, այսինքն' այն ծառայությունները, որով նա տուր փաթեթ է ստեղծել և ներկայացնում է զբոսաշրջիկներին: Իսկ երկրի պրոպագանդումը պետք է լինի պետական մակարդակով։ Մեզ համար այսօր լուրջ խնդիր է, որ ավելի ճանաչելի դառնանք, սակայն դա պետք է արվի բարձր մակարդակով և պատշաճ կերպով: Իսկ զբոսաշրջային կազմակերպությունները, տալով լավ արտադրանք և ներգրավելով նոր զբոսաշրջիկների, իրենց ներդրումը կունենան այդ գործում»,-ասաց Մինասյանը։

Տուրիզմի հայկական ինստիտուտի ռեկտորը, սակայն, այս ամենից բացի, կարևորում է զբոսաշրջիկի հետ վարվելու կուլտուրան։ Նրա խոսքով` զբոսաշրջիկներին գրավելու համար պետք է նրանց առաջարկել լավ ծառայություններ և ցուցաբերել բարեկիրթ վերաբերունք, այդ պարագայում միայն նրանք լավ կվճարեն և շնորհակալ կլինեն։ Այստեղ մասնագետը կարևոր է համարում Հայաստանի յուրաքանչյուր քաղաքացիների դերը, քանի որ, ըստ նրա, նրանցից ամեն մեկն է պետություն։