Բեռլինի պետական նվագախմբի հայաստանյան բացառիկ համերգին կհնչեն Շուբերտի և Բեթհովենի գործերը

Բեռլինի պետական նվագախումբը մեկ բացառիկ համերգով հանդես կգա Երևանում' լեգենդար դիրիժոր Դանիել Բարենբոյմի ղեկավարությամբ: Պատմական համերգը տեղի կունենա մայիսի 13-ին, «Արամ Խաչատրյան» համերգասրահում: ՀՀ կառավարությունը համերգի կազմակերպման համար Մշակույթի նախարարությանն է հատկացրել 120 մլն դրամ: Համերգային ծրագրում կհնչեն Ֆրանց Շուբերտի թիվ 8 «Անավարտ» և Լյուդվիգ վան Բեթհովենի թիվ 7 սիմֆոնիաները:

Գրեթե 450 տարվա ավանդույթներ ունեցող Բեռլինի պետական նվագախումբն աշխարհի հնագույն նվագախմբերից է: Այն հիմնվել է 1570 թվականին: Սկսած 1842 թվականից բազմաթիվ հայտնի երաժիշտներ, ինչպիսիք են Ֆելիքս Մենդելսոն-Բարտոլդին, Ռիխարդ Շտրաուսը, Ռիխարդ Վագները, Վիլհելմ Ֆուրթվենգլերը, Հերբերտ ֆոն Կարայանը և այլք ղեկավարել են նվագախումբը: 1992 թվականից նվագախմբի երաժշտական տնօրենն է Դանիել Բարենբոյմը: 2000 թվականին նվագախումբը քվեարկել է նրան ցմահ դիրիժոր ճանաչելու համար։

Բազմաթիվ համերգային ելույթները ինչպես եվրոպական երաժշտական մեծ կենտրոններում, այնպես էլ Իսրայելում, Ճապոնիայում և Չինաստանում, Հյուսիսային և Հարավային Ամերիկաներում, հաստատել են նվագախմբի բարձրագույն դիրքը: 2000, 2004, 2005, 2006 և 2008 թվականներին Բեռլինի պետական նվագախումբը «Opernwelt» հանդեսի կողմից հռչակվել է «Տարվա նվագախումբ»։ 2003-ին նվագախմբին շնորհվել է Ֆյուրթվենգլերի անվան մրցանակը:

Դարաշրջանի խոշորագույն դիրիժորներից և դաշնակահարներից մեկը' Դանիել Բարենբոյմը, ծնվել է 1942 թվականին, Բուենոս Այրեսում։ Նա ղեկավարել է աշխարհի առաջատար օպերային և սիմֆոնիկ նվագախմբերը, եղել է Փարիզի նվագախմբի գլխավոր դիրիժորը, այնուհետև, 1991-2006 թվականներին' Չիկագոյի նվագախմբի երաժշտական տնօրենը, որտեղ էլ ընտրվել է որպես ցմահ պատվավոր գեղարվեստական ղեկավար և գլխավոր դիրիժոր։ 1992 թվականին Բարենբոյմը դարձել է Բեռլինի պետական օպերայի գլխավոր երաժշտական տնօրենը և գեղարվեստական ղեկավարը։ 2000-ին Բեռլինի պետական նվագախումբն ընտրել է նրան ցմ ահ գլխավոր դիրիժոր: 2006-ից Բարենբոյմը դարձել է Միլանի «Լա Սկալա» թատրոնի գլխավոր հյուր-դիրիժորը՝ Ռիկարդո Մուտիի հրաժարականից հետո։ Բարենբոյմն արժանացել է բազմաթիվ մրցանակների և պարգևների:

Նա հայտնի է որպես Պաղեստինի իրավապաշտպան, հիմնել է «Արևմուտք-Արևելք Դիվան» նվագախումբը, աջակցել պաղեստինյան երեխաների երաժշտական կրությանը, տրամադրել է դրամական միջոցներ, հիմնել երաժշտական մանկապարտեզներ և Պաղեստինի երիտասարդական նվագախումբը:

2012-ի հուլիսին Բարենբոյմը և նվագախումբն առանցքային դեր են խաղացել' BBC-ի համար կատարելով Բեթհովենի ինը սիմֆոնիաները, որոնցից իններորդի կատարումը համընկել է 2012-ին Լոնդոնի Օլիմպիական խաղերի բացմանը: Բարենբոյմը կրել է օլիմպիական դրոշը բացման արարողության ժամանակ։

Նա հանդես է եկել նաև դասախոսություններով: Մի շարք գրքերի և հրապարակումների հեղինակ է, ինչպես նաև հանրահայտ համալսարանների պատվավոր դոկտոր, պրոֆեսոր: