Հայաստանյան «Կյանքի խոսք» եկեղեցին ֆինանսական պատճառներով չի հետևի Էկմանի օրինակին. Ալեքսանդր Ամարյան

Եթե «Կյանքի խոսք» եկեղեցու առաջնորդը համարում է, որ ինքը սխալ գաղափարախոսություն է դավանել, ապա մնացած բոլոր կառույցները պետք է հետևեն իրենց առաջնորդին և այլևս չգործեն: Այս մասին լրագրողների հետ զրույցում նշեց «Քայքայիչ պաշտամունքներից տուժածների օգնության ու վերականգնողական կենտրոնի» ղեկավար Ալեքսանդր Ամարյանը:

«Կյանքի խոսք» եկեղեցու առաջնորդի այն հայտարարությունը, թե ինքը հասկացել է, որ իրենց ճանապարհը ճիշտ չի եղել և վերադառնում է կաթոլիկ եկեղեցուն, մեծ աղմուկ հանեց ամբողջ աշխարհում: Եթե առաջնորդը և հիմնադիրն ասում է, որ ինքը սխալ է եղել, մնացած կառույցները չեն կարող գործել և պիտի հետևեն նրան: Բայց քանի որ Հայաստանում առկա են ֆինանսական գործոններ, այստեղ ցանկանում են պահպանել այդ աղանդը»,- նշեց Ալեքսանդր Ամարյանը:

Ամարյանի համոզմամբ, «Կյանքի խոսքը» միայն Հայաստանում 22, 5 հազար հետևորդ ունի, ինչպես նաև բազմաթիվ շինություններ, հեռուստաընկերություն, տպարան, որոնք լուծարման դեպքում խնդիրներ կառաջացնեն: «Մեծ գումարներ են ներդրված: Եթե կառույցը գնա ինքնալուծարման, իր բոլոր ենթակառույցները կանցնեն պետությանը: Եթե «Կյանքի խոսքի» հիմնադիրն ասում է' սխալ ենք, ապա պետք է նաև Հայաստանում կասեցնել գործընթացը կամ պետք է վերագրանցվեն այլ գաղափարներով»,-ընդգծեց Ամարյանը:

Ամարյանը վերհիշեց, որ ժամանակին խոսք կար, թե «Կյանքի խոսքն» ստեղծել են կաթոլիկները, որը նրանց ձեռքի տակի կառույց էր: «Կաթոլիկ եկեղեցին շատ լավ է աշխատել Ուլֆ Էկմանի վրա»,-փաստեց «Քայքայիչ պաշտամունքներից տուժածների օգնության ու վերականգնողական կենտրոնի» ղեկավարը:

Ամարյանի համոզմամբ` ճգնաժամում հայտնված մարդն է ենթարկվում հոգեորսության: Ցավում է, որ Հայաստանում չունենք կրոնական կառույցներով զբաղվող ինչ-որ կառույց:

«Քայքայիչ պաշտամունքներից տուժածների օգնության ու վերականգնողական կենտրոն»-ի ղեկավարի պնդմամբ, բոլոր աղանդավորական կառույցները ղեկավարում է մի աղբյուր: «Բոլորի հիմքը նեոհիսունականներն են: Մոտ 400 նման կառույց կա: Աղանդից աղանդ է դուրս գալիս: Եթե մեկը փակվում է, մյուները շարունակում են աշխատել»,-նշեց Ամարյանը:

Բացի այդ, բանախոսը նշեց, որ վերջերս ակտիվացել են Եհովայի վկաները, ովքեր սկսել են ներթափանցել պետական մարմիններ, իրավական ոլորտ: «Եհովայի վկաներ կան մանկավարժների շրջանում' դասավանդում են անգամ Հայոց եկեղեցու պատմություն առարկան»,- հավելեց Ամարյանը:

Մարտի 9-ին «Կյանքի խոսք» եկեղեցու հիմնադիր-առաջնորդ Ուլֆ Էկմանը պաշտոնապես հայտարարել է, որ «Կյանքի խոսք»-ը դառնում է կաթոլիկ եկեղեցու հետևորդ: Էկմանը հրաժարվել է իր իսկ հիմնադրած ուղղությունից' վերադառնալով կաթոլիկ եկեղեցու գիրկը: Աղանդի հետևորդների շրջանում մեծ իրարանցումը շարունակվում է: