Ծիծեռնակաբերդի հուշահամալիրում հավաքված ծաղիկները կունենան երկրորդ կյանք

Ծիծեռնակաբերդի հուշահամալիրում անմար կրակի մոտ դրված ծաղիկները բացիկներ ու շնորհակալագրեր կդառնան ու արտերկրի տարբեր կառույցներ ուղարկվելով` ևս մեկ անգամ կհիշեցնեն 20-րդ դարի մեծագույն ոճրագործության` Հայոց ցեղասպանության մասին: Վայրի բնության և մշակութային արժեքների պահպանման հիմնադրամը, գլխավոր գործընկեր «ՎիվաՍել-ՄՏՍ»-ի և Հայոց ցեղասպանության թանգարան-ինստիտուտի հետ համատեղ արդեն հինգերորդ անգամ ապրիլի 26-ին Ծիծեռնակաբերդի հուշահամալիրում իրականացրին հավաքված ծաղիկների վերամշակման գործընթացը: Ինչպես տեղեկացրին հիմնադրամից, միջոցառման շրջանակում բոլոր ծաղիկները խնամքով հավաքվում և տեղափոխվում են հուշարձանի հետնամաս, առանձնացվում են ցողունն ու ծաղկաթերթիկները:  Յուրահատուկ այս միջոցառմանը մասնակցել է նաև  Հայաստանում ԱՄՆ-ի արտակարգ և լիազոր դեսպան Ջոն Հեֆերնը:

Ծաղկի ցողուններից պատրաստվում է պարարտախառնուրդ` հուշահամալիրի այգիների մշակման համար, իսկ ծաղկի չորացված թերթիկները հիմնադրամի «Արևորդի» էկո-ակումբների սաներն օգտագործում են թղթի վերամշակման և ձեռքով պատրաստված բացիկների ձևավորման համար:

Այդ թուղթն է օգտագործում նաև Հայոց ցեղասպանության թանգարան-ինստիտուտը հուշագրեր, շնորհակալագրեր և հրավիրատոմսեր պատրաստելու համար, որոնք կիրառվում ե ոչ միայն Հայաստանում, այլև ուղարկվում են արտերկրի կառույցներ:  Ծաղիկների վերամշակման աշխատանքներն իրականացվում են անհատ կամավորների և ամենատարբեր կազմակերպություններ ներկայացնող կամավորական խմբերի միջոցով: Ամեն տարի աշխատանքներին կմասնակցեն շուրջ 300 կամավորներ: Կազմակերպիչների հավաստմամբ` ծաղիկների մշակումից ստացված պարագաները Հայոց ցեղասպանության մասին բարձրաձայնելու և ս մեկ խորհրդաշնական ձև են:

Մինչև 2010 թ. ապրիլի 24-ից հետո Ծիծեռնակաբերդում հավաքված միլիոնավոր ծաղիկներն ամեն տարի հուշահամալիրից հեռացվում էին որպես աղբ: Հիմնադրամն առաջարկել է անմեղ զոհերի հիշատակին նվիրաբերված բոլոր ծաղիկների հավաքման և հետագա կիրառման այլընտրանքային, առավել օգտակար, խորհրդանշական ու բնապահպանական տարբերակ: