Էդուարդ Շարմազանովը ոչ իշխանական խմբակցություններին մեղադրում է ոչ կառուցողական գործելակերպի մեջ

ՀՀ ԱԺ նախագահի պաշտոնակատար Էդուարդ Շարմազանովը հաշվիչ հանձնաժողովի աշխատանքներին չմասնակցող խմբակցություններին է մեղադրում արտահերթ նիստ հրավիրելու համար: ԱԺ ամբիոնից նման հայտարարությամբ հանդես գալով` ՀՀԿ-ական պատգամավորը նշեց. «Ժողովորդական խոսքն ասում է` «սելը ճռռալու փոխարեն, սելվորն է ճռռում», դուք հանձնաժողովի աշխատանքներին չեք ուզում մասնակցել' մոռանալով, որ մեզ բոլորիս ժողովուրդն ընտրել է աշխատելու համար»,- ասաց Էդուարդ Շարմազանովը:

Նա հավելեց, որ «ԱԺ Կանոնակարգ» օրենքի 24-րդ հոդվածը պարտադրում է, որ ԱԺ հաշվիչ հանձնաժողովի որոշումներն ընդունվեն մեծամասնությամբ: «Հիմա ինչ եք առաջարկում' մինչև սեպտեմբեր որևէ օրենք չընդունենք հաշվիչ հանձնաժողովի միջոցով: Ձեր ոչ կառուցողական գործունեության արդյունքում է, որ այսօր անցկացնում ենք արտահերթ նիստ, որպեսզի իրականացվի բոլորիս սուրբ պարտականությունը' ԱԺ բնականոն աշխատանքը: Մեր ժողովուրդը մեզ ընտրել է ոչ թե գեղեցիկ խոսելու, այլ այստեղ գալու ու պատասխանատու ձևով աշխատելու համար: Դուք հիմա մեզ պարտադրում եք, որ մենք չ աշխատենք»,- ավելացրեց Էդուարդ Շարմազանովը:

ՀՀԿ խմբակցության նախաձեռնությամբ ապրիլի 28-ին հրավիրվել էր արտահերթ նիստ, որտեղ քվեարկության դրվեց ԱԺ 5-րդ գումարման 5-րդ նստաշրջանի ժամանակավոր հաշվիչ հանձնաժողովի ձևավորման կարգի մասին որոշման մեջ փոփոխություն կատարելու մասին որոշման նախագիծը: Ժամանակավոր հաշվիչ հանձնաժողովի կազմը 13 հոգի սահմանելու հարցն անցավ միաձայն. քվերակությանը մասնակցում էր միայն ՀՀԿ խմբակցությունը: