Ադրբեջանում ձերբակալվել է հայտնի իրավապաշտպան Լեյլա Յունուսը

Ադրբեջանում ձերբակալվել են հայտնի իրավապաշտպան, Խաղաղության և ժողովրդավարության ինստիտուտի տնօրեն Լեյլա Յունուսը և նրա ամուսինը' կոնֆլիկտաբան Արիֆ Յունուսը:

Ինչպես հաղորդում է «Ազադլըգ» թերթը, ապրիլի 28-ի երեկոյան զույգը պետք է մեկներ Բրյուսել' մասնակցելու միջազգային գիտաժողովի: Բաքվի օդանավակայանում նրանց հայտնել են, որ երկրից ելքը նրանց համար արգելված է: Այն բանից հետո, երբ նրանց ուղեկիցները' Բաքվում Ֆրանսիայի դեսպանը և ԱՄՆ դեսպանի տեղակալը խոսել են Ադրբեջանի նախագահի աշխատակազմի ղեկավարի տեղակալ Նովրուզ Մամեդովի հետ, նրանց բաց են թողել, սակայն, հետո ինքնաթիռից իջեցրել և տարել են հարցաքննության:

Գիշերը Լեյլա Յունուսի տանը և աշխատավայրում խուզարկություններ են կատարվել: Խուզարկություններից հետո Լեյլա Յունուսն ու նրա ամուսինը ձերբակալվել են որպես լրագրող Ռաուֆ Միրկադիրովի գործով կասկածյալներ, որը գտնվում է հետաքննության տակ Ադրբեջանի Քրեական օրենսգրքի «հայրենիքի դավաճան» հոդվածով: Նրան մեղադրում են այն բանում, որ «ժողովրդական դիվանագիտության» միջազգային ծրագրով Ռաուֆ Միրկադիրովը մի քանի անգամ այցելել է Հայաստան և, իբր, համագործակցել հայկական հատուկ ծառայությունների հետ: Լեյլա Յունուսը Ռաուֆ Միրկադիրովի ապօրինի ձերբակալությունից հետո հայտարարել էր, որ հերթն իրենն է, քանի որ Ադրբեջանի իշխանությունը ցանկանում է ազատվել միջազգային կազմակերպությունների հետ համագործակցող անկախ ոչ կառավարական կազմակերպություններից և նրանց փոխարեն ներկայացնել իշխանամետ կազմավորումներ: