Հայաստանի երիտասարդական նվագախումբը դասական երաժշտությունը դարձնում է non-stop

Գիտություն և Մշակույթ 29 Ապրիլ, 2014 18:31

Հայաստանի պետական երիտասարդական նվագախմբին հաջողվել է իր համերգային տարբեր ծրագրերի' մասնավորապես Hollywood non stop ծրագրի միջոցով երիտասարդների մեջ արթնացնել սեր դասական երաժշտության նկատմամբ: Հայաստանի երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը ապրիլի 29-ին հրավիրված ասուլիսում փաստեց, որ իրենց համերգների ժամանակ լեփ-լեցուն դահլիճները վկայում են այն մասին, որ երիտասարդների ուշադրությունը դասականի հանդեպ վերջին տարիներին էապես մեծացել է:

«Անգամ նա, ով երբևէ դասական երաժշտության համերգի չի եղել, չգիտի, որ սիրում է դասական երաժշտությունը»,- կարծիք հայտնեց Սմբատյանը' հավելելով, որ այստեղ խնդիրը ոչ թե դասականը սիրել կամ չսիրելը, այլ այն հանրայնացնելն է:

«Դասական երաժշտությունը նույնպես կարող է պոպուլյար լինել»,- ընդգծեց ՀՊԵՆ գեղարվեստական ղեկավարը: Նրա գնահատմամբ, դասական երաժշտության նկատմամբ հայերի սերը խոր արմատներ ունի, ինչի մասին է վկայում նաև այն, որ երեք հայ ընտանիքից մեկում անպայման դաշնամուր կա:

Hollywood non stop համերգային ծրագրի միջոցով նվագախմբին հաջողվել է ունենալ շուրջ 7000 նոր հանդիսատես, որը պատրաստ է ներկա գտնվել լսելու նվագախմբի կատարմամբ ոչ միայն հոլիվուդյան ֆիլմերի հանրահայտ երաժշտություն, այլև, օրինակ, Ռախմանինովի ստեղծագործությունները:

«Մարդիկ սիրեցին մեր արվեստը, գաղափարը, և մենք հաղթեցինք: Կա հարգանք և, ամենակարևորը, ստեղծագործելու միտում»,- նշեց երաժիշտը:

Պատասխանելով «Արմենպրես»-ի թղթակցի հարցին' նա նշեց, որ առաջիկայում իրենք ինչպես և նախորդ տարի ստացել են բազմաթիվ արտերկրկա հրավերներ և այս ամառ ևս հանդես կգան հյուրախաղերով: Չբացելով բոլոր փակագծերը' նա հայտնեց, որ նվագախումբն այս տարի ևս հեղինակավոր փառատոնում հանդես կգա ոպես պաշտոնական նվագախումբ:

Անդրադառնալով լսարանների տարբերությանը' նա նշեց, որ հայ հանդիսատեսը ջերմ է ամենուր, սակայն հայ հանդիսատեսի առաջ ելույթ ունենալը պատասխանատու է և կարևոր:

Սմբատյանը ոգոևորությամբ պատմեց նաև նվագախմբի նոր նախագծի' Cartoon Non-Stop ծրագրի մասին: Մայիսի 30-ին, 31-ին և հունիսի 1-ին կայանալիք երեք համերգի ընթացքում Ալ. Սպենդիարյանի անվան ազգային ակադեմիական թատրոնում նվագախումբը կկատարի հայտնի և սիրելի մուլտֆիլմերի այցեքարտերը դարձած մեղեդիները:

«Այն երեխանեըը, ովքեր ներկա կգտնվեն այս համերգներին, վստահ եմ, որ տարիներ անց իրենց մեջ կկրեն այդ արժեքները»,- կարծիք հայտնեց դիրիժորը' վստահեցնելով, որ հանդիսատեսը կայանալիք համեգներին տպավորությունների պակաս չի զգա: Սմբատյանը նաև տեղեկացրեց, որ non-stop խորագրով համերգաշարերը շարունակական են լինելու, և իրենք ջանք չեն խնայելու նոր ու հետաքրքրական ձևաչափերով հանդիսատեսին ներկայանալու համար:

Պատասխանելով այն հարցին, թե ինչպես է ինքը վերաբերվում քննադատությանը' երաժիշտը նշեց, որ քննադատությանը լավ է վերաբերվում, սակայն այն պետք է նաև կառուցողական լինի և առաջարկներ պարունակող: