«Հրապարակ». Հերթական անգամ «արյան կանչով» իշխանության գիրկը նետվեցին ԲՀԿ-ն և ՕԵԿ-ը

Ազգային ժողովի նախագահի ընտրությունը կրկին փորձություն դարձավ քաղաքական դաշտի եւ հատկապես ոչ իշխանական հատվածի համար։ Հերթական անգամ «արյան կանչով» իշխանության գիրկը նետվեցին իր տեղն ընդդիմադիր դաշտում ապահոված ԲՀԿ-ն եւ օրերս ընդդիմության մկրտությունն ստացած ՕԵԿ-ը: Գրում է «Հրապարակ»-ը:

Եթե ՕԵԿ-ի դավաճանությունը սովորականի պես ընկալվեց, ապա ապշեցնող էր ԲՀԿ-ի պահվածքը. պարզվեց, որ ոչ վաղ անցյալում գործադիր իշխանության ղեկավար Տիգրան Սարգսյանի բմբուլները քամուն տվող ԲՀԿ-ի նախընտրած ԱԺ նախագահի թեկնածուն իշխանության թեկնածուն է։ Այլընտրանք հռչակված ԲՀԿ-ն ոչ միայն դավաճանեց դաշնակիցներ՝ հրաշալի քառյակի մաս կազմող կուսակցություններին եւ մասնակցեց խորհրդարանի խոսնակի ընտրությանը, այլեւ մոտ 30 հոգով միաձայն քվեարկեց ոչ թե Հրանտ Բագրատյանի, այլ Գալուստ Սահակյանի օգտին։ Քանի որ առանց նման «պադդերժկայի» անհնար կլիներ Գալուստի համար 101 կողմ ձայն ապահովել խորհրդարանում, եւ վտանգ կար, որ ներկա 68 հանրապետականները «պրավալ» կտան իշխանության կարեւոր օպերացիան։ ԲՀԿ-ից խմբակցության պաշտոնական տեսակետ ներկայացվեց, թե իրենք այդքան էլ չեն կարեւորում այդ ընտրությունը եւ ազատ են թողել դրանք, իսկ քառյակի հետ միասնական թեկնածու չառաջադրելու վերաբերյալ էլ նույն չհիմնավորված լոլոներն էին տարածում, թե քառյակում չեն քննարկել այդ հարցը։

Քառյակն ըստ ամենայնի ստեղծվել էր միայն Տիգրան Սարգսյանի հրաժարականը պահանջելու համար, որովհետեւ վերջինի պաշտոնանկությունից հետո այն անգործության է մատնվել, եւ որեւէ միասնական օրակարգ, անգամ ԱԺ նախագահի ընտրության անշառ հարցը չեն կարողանում ձեւավորել։
ԲՀԿ-ի լեդին այնպես էր ահաբեկել կուսակիցներին, որ ընտրությունից հետո բոլորը միաբերան մեր հարցերին ի պատասխան կամ կրկնում էին վերջինի խոսքերը, կամ էլ ուղղորդում դեպի նա։ Մասնավորապես, Մարտուն Գրիգորյանը մեր հարցին, թե ինչ արժանիքներ ուներ Գալուստ Սահակյանը, որը չունի Հրանտ Բագրատյանը, կմկմաց, թե քվեարկությունը գաղտնի է, եւ ինքը որեւէ բան ասել չի ցանկանում։ ԲՀԿ-ական պատգամավորն անդրդվելի մնաց նույնիսկ այն պարագայում, երբ բացատրեցինք, որ ընտրության արդյունքներից ակնհայտ է, թե ում օգտին են իրենք քվեարկել։

Մեր հաջորդ հարցն էր, թե իշխանության մեջ Տիգրան Սարգսյանից բացի կա՞ մեկը, որի դեմ ԲՀԿ-ն կարող է ուղղել իր քննադատությունը։ «Մենք քննադատել ենք կառավարությանը, եւ եթե այս կառավարությունն էլ նույն գիծը վերցնի, բնականաբար, ԲՀԿ-ն արտահայտելու է այն դիրքորոշումը, ինչը նախորդ ժամանակ։ Բայց տեսաք՝ Սեւանի մասին օրինագծի վերաբերյալ մեր առաջարկը կառավարությունը բավարարեց, ինչպե՞ս կողմ չքվեարկեինք»,- նորընտիր վարչապետ Հովիկ Աբրահամյանին գովելու հերթական շանսը բաց չթողեց հերթական ԲՀԿ-ականը:

Գրիգորիչի պատճառով դաշնակիցներ ՀԱԿ-ին եւ ՀՅԴ-ին դավաճանելու դիտարկմանն էլ ԲՀԿ-ական պատգամավորը կրկնեց անհեթեթ պատասխանը, թե իրենք չեն կարեւորում այդ ընտրությունները։ Նա չբացառեց, որ կուսակցությունը նորից կվերադառնա իշխանության գիրկը. «Կուսակցությունն ինչպես կորոշի, ես պատրաստ եմ ենթարկվել, ես որոշումները կատարող եմ»։
Ինչի՞ն կամ ո՞ւմ է այլընտրանք ԲՀԿ-ն՝ հարցրինք մեկ այլ պատգամավորի՝ Վահե Հովհաննիսյանին, պատգամավորը, անակնկալի եկած, հստակ պատասխան չտվեց եւ կրկին ցույց տվեց խմբակցության քարտուղարի տեղը:

«Հնարավո՞ր է լքեք քառյակը եւ այլեւս տեղ գտնեք այլ դաշտում» հարցը Միքայել Մելքումյանը սխալ համարեց. «Մենք ունեցել ենք հստակ ռեժիմ ֆրակցիայում, թողել ենք խղճի մտոք քվեարկության»։ «ԲՀԿ-ի խիղճն իշխանության օգտին է, փաստորեն, որովհետեւ իշխանության թեկնածուն ձեր թեկնածուն է» մեր դիտարկմանը Մելքումյանը միայն բարձրաձայն ծիծաղեց:

Ինչ է պատրաստվում անել ԲՀԿ-ին պարբերաբար շանս տվող, նրա հետ «բուրժուադեմոկրատական հեղափոխության» հույսեր կապող, բայց միշտ քցվող ՀԱԿ-ը։ Խմբակցության ղեկավար Լեւոն Զուրաբյանն ասաց. «Իրավիճակը կվերլուծենք՝ կասենք»։ Բայց պարզից էլ պարզ է, որ ԲՀԿ-ն նախընտրեց իշխանությանը, ՀԱԿ ղեկավարը նույն պատասխանը տվեց։ Այսուհանդերձ, քառյակի աշխատանքները հնարավո՞ր են. Զուրաբյանը կրկին հիշեցրեց նախորդ պատասխանը, ապա նաեւ ասաց. «Այս 2 տարվա մեջ այնքան բան է եղել, այնքան նահանջներով եւ նորից վերանվաճումներով ենք անցել, որ ընդհանրապես պետք չէ հեռու գնացող եզրակացություն անել որեւէ հանգրվանում»։ ԲՀԿ-ի պայքարն արդյոք անձնավորված եւ արդեն սպառված չէ՞ Տիգրան Սարգսյանի հրաժարականից հետո. «Ես չեմ ցանկանում մեկնաբանել ԲՀԿ-ի գործողությունները, կարծում եմ, որ եթե ինչ-որ բան ուզում եք ստանալ, ապա ԲՀԿ-ին պետք է դիմել»։ ՀՅԴ-ն եւս, ըստ էության, ԲՀԿ-ից հրաժարվել չի պատրաստվում եւ հետագա համագործակցության հարցին պատասխանում է. «Մենք ասել ենք եւ նորից շարունակում ենք ասել՝ համագործակցում ենք այն հարցերի հետ կապված, որոնք համաձայնեցնում ենք եւ որեւէ խնդիր չենք տեսնում, որ որեւէ կուսակցություն ինքնուրույն դիրքորոշում ունենա տարբեր հարցերով»։ Որքան էլ դժվար լինի խոստովանել, ակնհայտ է, որ ԲՀԿ-ն, ոչ իշխանական դաշտն իրենով անելուն զուգահեռ, ձեռք չի քաշում իշխանությունից։

Շարունակությունը` «Հրապարակ» օրաթերթի այսօրվա համարում: