Էդուարդ Շարմազանովը բացատրել է ԱԺ նիստում ընդմիջում վերցնելու պատճառները

Ազգային ժողովի ՀՀԿ խմբակցությունն ամեն գնով օրենքներ անցկացնելու մոլուցքով չի տառապում: Այս մասին «Ակցիզային հարկի մասին» ՀՀ օրենքում փոփոխություններ և լրացումներ կատարելու մասին նախագծի քվեարկությունից առաջ 20 րոպե ընդմիջման ընթացքում լրագրողների հետ զրույցում ասաց ԱԺ փոխխոսնակ Էդուարդ Շարմազանովը՝ պատասխանելով լրագրողներից մեկի հարցին, թե ՀՀԿ-ն ընդմիջում է վերցրել, որպեսզի լրացնի՞ իր պատգամավորների քանակը և անցկացնի նախագիծը: «Հիմա խմբակցությունը 20 րոպե ընդմիջում է հայտարարել, և ընդմիջումից հետո արդեն նիստը վարողը, ԱԺ նորընտիր նախագահը կորոշի' ինչպես վարվել: Կանոնակարգը թույլ է տալիս կա’մ հետաձգել հարցը, կա’մ դնել քվեարկության, այլևս ես չեմ նիստը վարողը, պարոն Սահակյանը ինքը կորոշի»,- ասաց Շարմազանովը:

Նա նշեց, որ «Հանրապետական» մեծամասանությունը, հաշվի առնելով, որ ոչ իշխանական ուժերը հրաժարվեցին մասնակցել քվեարկությանը, այդ թվում նաև նրանք, որոնց կուսակցության ներկայացուցիչներն այս օրենքի վերաբերյալ նախօրեին իրենց ելույթում բացառապես դրական գնահատականներ էին հնչեցնում, մեծամասնությունը որոշել է ընդմիջում վերցնել՝ հասկանալու համար, թե ինչպես է վարվի:

Ազգային ժողովի ՀՀԿ խմբակցությունը «Ակցիզային հարկի մասին» ՀՀ օրենքում փոփոխություններ և լրացումներ կատարելու վերաբերյալ նախագծի քվեարկությունից առաջ րոպե ընդմիջում էր վերցրել, քանի որ ոչ իշխանական ուժերը հրաժարվել էին մասնակցել քվեարկությանը: Ընդմիջումից հետո ԱԺ-ն ձայների մեծամասնությամբ ընդունեց նախագիծը, որով առաջարկվում է հանել թեթև մարդատար ավտոմեքենաների համար սահմանված «շքեղության հարկը»: