ԱԻՆ պատմության մեջ առաջին անգամ հրշեջ-փրկարարական ջոկատը կին կղեկավարի

ՀՀ ԱԻ նախարարի հրամանով այսօր' ապրիլի 30-ին, ԱԻ համակարգի պատմության մեջ առաջին անգամ, հրշեջ-փրկարարական ջոկատի հրամանատար է նշանակվել երիտասարդ աղջիկ' Սևանի հատուկ ջրափրկարարական ջոկատի հատուկ բարդության ջրասուզական խմբի հրամանատարի տեղակալ, լեյտենանտ Էվելինա Խաչատրյանը: «Մեր առաջին հանդիպման ժամանակ խոստացար, որ լավ ես աշխատելու: Տեսնում եմ' կատարում ես խոստումդ, բայց կարո՞ղ ես ավելի մեծ պատասխանատվություն վերցնել քեզ վրա»,-նշել է ԱԻ նախարարը: «Ամեն ինչ էլ հնարավոր է, սակայն ես կաշխատեմ արդարացնել Ձեր վստահությունը»,- նախարարի հարցին ի պատասխան' ասել է Էվելինան: Նախարար Արմեն Երիցյանը շնորհավորել է նրան նոր և պատասխանատու պաշտոն ստանձնելու կապակցությամբ' նշելով, որ հավատում է նրա ուժերին:

Սևանի ՀՓՋ նոր հրամանատարը ծանոթ է իր անձնակազմին, քանի որ հաճախ միասին են արձագանքում արտակարգ դեպքերի կանչերին, վստահ է, որ ծառայակիցների հետ կաշխատեն հարգալից ու համերաշխ մթնոլորտում' շարունակելով նաև համագործակցել ջրափրկարարական ջոկատի հետ:

ՀՀ ԱԻ նախարար Արմեն Երիցյանի հրամանով նշանակումներ են կատարվել նաև ՓԾ Երևան քաղաքի վարչությունում, ՓՈՒՎ կարևորագույն օբյեկտների պահպանության բաժնում, ՕԿՎ ճգնաժամային կառավարման կենտրոնում, ինչպես նաև Արմավիրի, Գեղարքունիքի, Կոտայքի, Շիրակի, Տավուշի, Լոռու և Սյունիքի մարզերի հրշեջ-փրկարարական ջոկատներում: