Հայաստանի համար ամենավտանգավոր քայլը

Մոտ մեկ ամիս առաջ նախագահ Սերժ Սարգսյանին ներկայացվեց ՀՀ Սահմանադրական բարեփոխումների հայեցակարգի ծրագիրը: ՀՀ սահմանադրական բարեփոխումների հայեցակարգի նախագծի նախնական տարբերակն արդեն պատրաստ է և տեղադրված է ՀՀ արդարադատության նախարարության պաշտոնական կայքէջում:

«Նոր ժամանակներ» կուսակցության ղեկավար Արամ Կարապետյանի համոզմամբ` Սահմանադրության մեջ փոփոխություններ կատարելն անհրաժեշտություն է: Նման կարծիք Արամ Կարապետյանը հայտնեց Լուրեր.com-ի հետ զրույցում:

«Ես կարծում եմ և համոզված եմ, որ Սահմանադրության մեջ պետք է փոփոխություններ մտցնել, համոզված եմ, որ այդ փոփոխությունների անհրաժեշտությունը կա, սակայն Հայաստանի համար ամենավատ փոփոխությունը կլինի հիմա նախագահական տիպի պետությունից հրաժարվելը: Կարծում եմ, որ այդ փոփոխությունները պետք է բերեն համակարգի էլ ավելի պարզեցմանը և բալանսավորմանը:

Ուժեղ նախագահական պետության ժամանակ կոալիցիոն կառավարությունը մի քիչ անհասկանալի է, դա նոնսենս է. կամ լինում է ուժեղ նախագահական պետություն` ինչպես ԱՄՆ-ում է, կամ լինում է կոալիցիոն կառավարությունների սկզբունք: Այսինքն` կառավարությունը կազմում են խորհրդարանական կուսակցությունները` ինչպես, ասենք, Գերմանիայում: Մեզ մոտ երկուսն էլ ուժեղացված է, դա գալիս է նրանից, որ մեզ մոտ ոչ մեկ երբևէ չի մտածել քաղաքական համակարգի մասին, միշտ մտածում են անհատական, որոշակի իրենց խնդիրները լուծելու, բաժինները բաշխելու և այլնի մասին»,- ասաց Արամ Կարապետյանը:

Վերջինիս խոսքով՝ Սահմանադրությունը համակարգելու և բարեփոխելու խնդիր, իհարկե, կա: «Դատական համակարգի հետ կապված խնդիրներ կան, որոնք սահմանադրական են, կան խնդիրներ, որոնք միանշանակ կապվում են որոշակի գործողությունների տրամաբանության հետ, մարզպետարանների գործողությունների և այլնի հետ: Այսինքն` համակարգային շատ լուրջ փոփոխությունների կարիք կա Հայաստանում, այդ թվում նաև` սահմանադրական բարեփոխումների: Կասկած լինել չի կարող, բայց ես գտնում եմ, որ դա նոր էլիտայի խնդիրը պետք է դառնա, դրանում պետք է աշխատեն հրաշալի մասնագետներ, դրանում պետք է աշխատեն մասնագետներ, որոնք շահագրգիռ չեն իրենց կողմը քաշելու»,- նշեց կուսակցության ղեկավարը:

Արամ Կարապետյանը համոզմունք հայտնեց նաև, որ Հայաստանը դեռևս ոչ մի քայլ չի անի նախագահական պետությունից: «Դա շատ վտանգավոր բան է, եթե մենք հիմա ուզում ենք կործանել երկիրը, հենց այդ քայլը անելու համար է: Այս պահին այդ քայլը ուղղակիորեն երկիրը քայքայել է նշանակում ընդհանրապես»,- ասաց Կարապետյանը: