Ջազն ունկնդիրների պակաս չի զգում. Երևանում Ջազի միջազգային օրը կնշվի մեծ համերգով

Ջազի միջազգային օրվա առիթով մայրաքաղաքի երաժշտասերներին այս տարի ևս կմատուցվի հաճելի նվեր. հայկական ջազի ամենավառ ներկայացուցիչները «Կասկադ» համալիրի տարածքում հանդես կգան համերգով, ոը նվիրված է ամբողջ աշխարհում ապրիլի 30-ին նշվող Ջազի միջազգային օրվան:

«Արմենպրես»-ի թղթակցի հետ զրույցում ջազ երաժիշտ Լևոն Մալխասյանը նշեց, որ Երևանի քաղաքապետարանի կողմից «Կասկադ» համալիրի տարածքում համերգ նախաձեռնվում է արդեն երրորդ տարին:

«Ջազային համերգները միշտ էլ հանդիսատեսով լեցուն են, ջազը երբեք ունկնդիրների պակաս չի զգում. դա օրինաչափություն է»,- ասաց Մալխասյանը:

Նրա խոսքով' այս համերգը նույնպես հնարավորություն կտա երեւանցիներին մի քանի ժամերի ընթացքում լսել որակյալ երաժշտություն: Համերգի ընթացքում կհնչեն ոչ միայն հայկական, այլեւ համաշխարհային լավագույն ջազային ստեղծագործությունները:

Ջազ երաժիշտ Արմեն Թութունջյանը նույնպես մասնակցելու է այսօր երեկոյան կայանալիք համերգին: Նա հանդես է գալու «Չիկո ընկերներ», ինչպես նաև Վահանգն Հայրապետյանի քառյակում:

Ջազի վարպետներն այսօր շնորհավորանքների պակաս չեն զգացել: Դաշնակահար եւ կոմպոզիտոր Հերբի Հենկոկի նախաձեռնությամբ հիմնված այս տոնն այսօր նշվում է ողջ աշխարհում: Տոնական միջոցառումներին մասնակցում են ջազի հայտնի աստղերից շատերը: Ապրիլի 30-ին, բացի «Կասկադ» համալիրի տարածքում համերգային ծրագրից, մայրաքաղաքի երաժշտական ակումբներում նույնպես նախատեսվում են համերգային ծրագրեր ջազ երաժիշտների մասնակցությամբ:

Ջազային կյանքն ակտիվ է նաև Գյումրիում' շնորհիվ «Ջազը և Գյումրին» արդեն երկու տարվա կեսնագրություն ունեցող երաժշտական նախագծի: Հայաստանյան ամենասպասված ջազային իրադարձություններից մեկը հանրահայտ երգչուհի Տաթևիկ Հովհաննիսյանի համերգներն են հայրենիքում. այս անգամ դրանցից երկուսը կկայանան Երևանում, մեկական' Ստեփանակերտում և Գյումրիում: