ԲՀԿ երկու թևերը

Երեկ Ազգային ժողովում փակ քվեարկության արդյունքում ԱԺ նախագահ է ընտրվել ՀՀԿ խմբակցության ղեկավար, ՀՀԿ փոխնախագահ Գալուստ Սահակյանը: Գալուստ Սահակյանը հավաքել է 101 ձայն, Հրանտ Բագրատյանը՝ 3 ձայն: Քվեարկությանը մասնակցել է 106 պատգամավոր, երկու քվեաթերթիկ անվավեր է ճանաչվել:

ՀՅԴ-ն ՀԱԿ-ը և «Ժառանգությունը» քվեարկությանը չեն մասնակցել: ՕԵԿ-ն ու ԲՀԿ-ն իրենց պատգամավորներին ազատ են թողել ԱԺ նախագահի ընտրության հարցում:

Քվեարկությունից հետո, մի շարք ԲՀԿ-ական պատգամավորներ հայտարարեցին, որ քվեարկել են Հրանտ Բագրատյանի օգտին:
Լուրեր.com-ը «այլընտրանքային» ԲՀԿ-ի քվեարկության վերաբերյալ զրուցեց քաղաքական և ընտրական տեխնոլոգիաների փորձագետ Արմեն Բադալյանի հետ:

«Արդեն շատ ակնառու դարձավ, որ «Բարգավաճ Հայաստանում», փաստորեն, կա երկու թև՝ քաղաքական թևեր և գործարար թև, և գործարար թևը Հանրապետականի համար անհրաժեշտ քվեարկությանն ապահովեց համապատասխան ձայների քանակ»,- ասաց Բադալյանը:

Վերջինիս կարծիքով՝ Ազգային ժողովի նախագահի ընտրություններն այդքան էլ էական չեն, «որովհետև Հայաստանում Ազգային ժողովն արդեն վերածվել է գյուղի կլուբի, ԱԺ-ում ընտրում են ոչ թե Ազգային ժողովի նախագահ, այլ գյուղի կլուբի նախագահ: Կա երկրորդ կարևոր քվեարկություն՝ կառավարության ծրագրի քվեարկությունը: Կառավարության ծրագրի քվեարկությունը ՀՀԿ-ի համար խիստ սկզբունքային քվեարկություն է, որի ժամանակ էլ կտեսնենք՝ արդյոք նույնը կկրկնվի՞ ԲՀԿ-ի գործարար թևի հետ, թե՞ ոչ: Կառավարության ծրագրի քվեարկությանը ԲՀԿ-ի գործարար թևը կմասնակցի՞ և եթե մասնակցի՝ կողմ կքվեարկի՞, թե՞ ոչ: Այդտեղից որոշակի հարցեր կարող ենք եզրակացնել, մասնավորապես այն, որ եթե Հանրապետական կուսակցությանը խիստ անհրաժեշտ քվեարկություն լինի՝ նա կարո՞ղ է հույսը դնել, ինչպես, ի դեպ, ՕԵԿ-ի անդամների քվեարկության վրա, չնայած իրենք իրենց ընդդիմություն են համարում, այնպես էլ ԲՀԿ-ի գործարար թևի քվեարկության վրա: Հիմա դա կազդի՞ ոչ իշխանական ուժերի հարաբերությունների վրա, թե ոչ: Իհարկե, կազդի, բայց հաշվի չեն առնի ոչ իշխանական ուժերը, որովհետև, եթե հաշվի առնեն, ի՞նչ պետք է անեն», - ասաց Արմեն Բադալյանը՝ հավելելով, որ ԲՀԿ-ն ի վերջո պետք է հստակեցում մտցնի իր կուսակցության և կուսակցական իմիջի մեջ: