Տարոն Մարգարյանը կենդանաբանական այգու նոր տարեշրջանի առաջին այցելուներից էր

Երևանի կենդանաբանական այգին իր հյուրընկալ դռները բացեց բազմաթիվ այցելուների առջև: Բազմաթիվ ծնողներ մայիսի 1-ին իրենց երեխաներին կենդանաբանական այգի էին բերել, որպեսզի ցույց տան նրանց տարբեր կենդանիների և մասնակցեն մի շարք միջոցառումների: Այգու առաջին այցելուներից էր նաև Երևանի քաղաքապետ Տարոն Մարգարյանը, ով եկել էր իր չորս երեխաների հետ:

«Բոլորիս շնորհավորում եմ այգու բացման և Աշխատողի օրվա կապակցությամբ: Կուզենայի թե' որպես քաղաքապետ, թե' Հայաստանի քաղաքացի, որ գործազրկությունը քչանար, որպեսզի մենք կարողանանք ի սրտե նշել Աշխատողի օրը: Մենք փուլերի ենք բաժանել կենդանաբանական այգու վերակառուցման ծրագիրը: Այս տարի Երևանի բյուջեով նախատեսել ենք 300 միլիոն դրամ գումար, որը կուղղվի վանդակների կառուցմանը և վերակառուցմանը, այգու տարածքի կանաչապատմանը, անտառային գոտու ավելացմանը և ոռոգման ցանցի ընդլայնմանը: 2-3-րդ փուլերի համար' 2015-16թթ., մենք պետք է բյուջեով միջոցներ նախատեսենք: Հրավիրել ենք արդեն կենդանաբանական այգիների մասնագետների, նախագծողների, որոնք աշխարհում ընդունված չափանիշների համաձայն նախագծերի փաստաթուղթ կներկայացնեն, և մենք ավելի շատ միջոցներ կտրամադրենք այգու վերակառուցման համար»,- նշեց Երևանի քաղաքապետը:

Հարցին, թե ինչ է հիշողություններ ունի Տարոն Մարգարյանը կենդանաբանական այգու վերաբերյալ, քաղաքապետը նշեց, որ այնքան էլ շատ հուշեր չունի: «Փորձում եմ այսօր կենդանաբանական այգու ծրագրերն իրականացնել, որպեսզի մեր երեխաները հուշեր ունենան: Վերջին երկու տարին բերում եմ երեխաներիս կենդանաբանական այգի»,- հավելեց Մարգարյանը:

Երևանի կենդանաբանական այգու տնօրեն Ռուբեն Խաչատրյանը կարևորեց այգու հիմնանորոգման ծրագիրը: «Սա հանրային գոտի է, որը ծառայում է երեխաներին: Պետք է ընդլայնել, բարեկարգել տարածքները, որպեսզի այգին երկարատև ծառայի հանրությանը: Այս և հետագա տարիներին կլինեն կոնկրետ քայլեր այդ ուղղությամբ: Ունենք երեք տարի, որպեսզի ձևափոխենք այգին և ընդունվենք Եվրոպական կենդանաբանական այգիների և ակվարիումների ասոցիացիա: Քաղաքապետարանը մեծ գումարներ է տրամադրում նախագծերն իրականացնելու համար»,-նշեց Խաչատրյանը:

Կենդանաբանական այգու տնօրենը նշեց, որ այգում հայտնվել է նոր կենդանատեսակ' հարավամերիկյան ընձառյուծը, որն ընտանիք է կազմելու այգու ընձառյուծի հետ: Բացի այդ, ավելացել են թռչնատեսակներ: «Այս տարի 5 նոր տարբեր կենդանատեսակներ կունենանք: Հայաստան Թբիլիսիից ավելի երիտասարդ և առողջ փիղ կբերվի»,- հավելեց Խաչատրյանը:

Երևանի կենդանաբանական այգին կաշխատի մինչև երեկոյան 22:30-ը: Այգին այցելուներին ներկայացավ մի շարք նորություններով' նոր կենդանատեսակներով և բարեկարգված տեսքով: Փոքրիկ ընթերցողներին ներկայացվեց «ԶՈՒ» ամսագիրի նորացված տարբերակը: Այս տարի ևս այցելուներին սպասվում էին հաճելի անակնկալներ և տոնական տրամադրություն՝ լի անմոռանալի միջոցառումներով, կենդանի երաժշտությամբ, թատերականացված ներկայացումներով և խաղային տաղավարներով: Երաժշտական կատարումներով հանդես եկան մի շարք երաժշտական և արվեստի դպրոցների սաներ, թատերական խմբեր, ստեղծագործական կենտրոններ։ Միջոցառումներով ազդզրարվեց Երևանի կենդանաբանական այգու տարեշրջանի պաշտոնական բացումը։