Ֆիլհարմոնիկը մայիսին անակնկալներ կմատուցի հանրությանը

Հայաստանի պետական ֆիլհարմոնիկ նվագախումբն անակնկալներ է պատրաստել իր ունկնդրիների համար` նաև հրավիրված երաժիշտների մասնակցությամբ:

Մայիսի 2-ին Ռուբեն Ասատրյանը կղեկավարի նվագախումբը՝ ներկայացնելով Բեթհովենի թիվ 5 սիմֆոնիան, Էնեսկուի թիվ 1 «Ռումինական» ռապսոդիան և Բիզեի թիվ 1 սյուիտը «Կարմեն» օպերայից:

Մայիսի 16-ին գերմանացի դիրիժոր Օլիվեր Վեդերի ղեկավարությամբ կհնչեն Ռոբերտ Շումանի թիվ 1 սիմֆոնիան և Վաչե Շարաֆյանի «Երկրորդ լուսինը» բալետից երեք հատված, հայտնի թավջութակահար Ռամոն Յաֆեի կատարմամբ' Դմիտրի Կաբալևսկու թավջութակի թիվ 2 կոնցերտը: Ռամոն Յաֆեն կանցկացնի նաև վարպետության դասեր:

Մայիսի 23-ին ռումինացի ճանաչված ջութակահար Ալեքսանդրու Տոմեսկուն ՀՊՖՆ-ի հետ կկատարի Մենդելսոնի ջութակի կոնցերտը, իսկ երիտասարդ տաղանդավոր դաշնակահարուհի Վալենտինա Բաբորը՝ Մոցարտի դաշնամուրի թիվ 9 կոնցերտը: Համերգի երկրորդ բաժնում կհնչի Մոցարտի թիվ 34 սիմֆոնիան:

Մայիսի 30-ին Հայաստանում Ֆրանսիայի դեսպանատան հետ միասին ՀՊՖՆ-ն կներկայացնի Եղիսաբեթ թագուհու անվան միջազգային հեղինակավոր մրցույթի մրցանակակիրներին՝ ֆրանսիացի դաշնակահար Ռեմի Ժընիեին և ֆրանսահայ կոմպոզիտոր Միշել Պետրոսյանին: Նախ կներկայացվի վերջինիս «Էայի ջրահետքերով» ստեղծագործության հայաստանյան պրեմիերան, ապա՝ Մոցարտի թիվ 20 դաշնամուրի կոնցերտը:

Բացի այդ, մայիսի 5-ին Վիեննայի «Մյուզիքֆերայն» դահլիճում Էդուարդ Թոփչյանը կղեկավարի Սլովակիայի ռադիոյի սիմֆոնիկ նվագախումբը: