«Առավոտ». «ՌԴ հատուկ ծառայությունները Երեւանում կազմակերպել էին «Մայիսի 1» հատուկ գործողություն»

Ըստ Դավիթ Շահնազարյանի, ՌԴ հատուկ ծառայությունները Երեւանում կազմակերպել էին «Մայիսի 1» հատուկ գործողություն». «Կեցցե հայ-ռուսական բարեկամությունը, Ռոսիա՛ն, Կեցցե՛ Պուտինը, կեցցե՛ Մաքսային միությունը, մենք Պուտինի հետ ենք». այս եւ նմանատիպ կարգախոսներով երեկ կոմունիստական կուսակցության ներկայացուցիչներն ու համախոհները երեւանյան փողոցներում մայիսմեկյան շքերթ էին կազմակեպել: Նրանք հայտարարում էին, որ սիրում են Պուտինին եւ կոչ անում աջակցել Պուտինի նախաձեռնած լայնածավալ ինտեգրացիոն գործընթացին՝ վստահեցնելով, որ Հայաստանի գալիք անդամակցումը Մաքսային միությանը «բազմաչարչար հանրապետության ժողովրդի համար ճակատագրական ելքն է, մեզ անկախություն պետք չի»:

Այս առնչությամբ «Առավոտի» հետ զրույցում «Համաձայնություն» կենտրոնի նախագահ, Հայաստանի Հանրապետության Ազգային անվտանգության ծառայության նախկին ղեկավար Դավիթ Շահնազարյանը հայտարարեց, որ այդ շքերթը կազմակերպել էին Ռուսաստանի հատուկ ծառայությունները. «Երեւանում Ռուսաստանի հատուկ ծառայությունները այսօր կազմակերպել էին Մայիսմեկյան գործողություն՝ ուղղված Հայաստանի պետականության, Հայաստանի ինքնիշխանության դեմ: ԿԳԲ-ական այդ գործողությունն անցնում էր մայիսմեկյան կոմունիստական շքերթի անվան տակ՝ կարմիր դրոշներով, «մուրճ եւ մանգաղով» եւ Կրեմլի այսօրվա նեոկայսերապետական գաղափարախոսությամբ: Իրականացնողները նույն կանաչ մարդուկներն էին՝ «зеленые человечки», որոնք այսօր Ուկրաինայի արեւելքում իրագործում են Պուտինի ծրագիրը՝ տապալել Ուկրաինայի տարածքային ամբողջականությունն ու ինքնիշխանությունը եւ Ուկրաինան դարձնել Ռուսական կայսրության մաս, ինչպիսին այսօր Հայաստանն է: Ինչպես Ուկրաինայում, այնպես էլ Հայաստանում այդ գործողությունները ծրագրվում ու կառավարվում են մոսկովյան նույն կենտրոնից: Ի տարբերություն Ռուսաստանի հատուկ ծառայությունների կողմից հովանավորված 2008-ի Մարտի 1-ի գործողության, այսօրվա հրազենի փոխարեն կոմունիստական կարմիր դրոշներ են օգտագործել, որոնք ավելի են հարվածում մեր պետականությանը, քան Մարտի 1-ի սպանդը»:

Շարունակությունը` «Առավոտ» օրաթերթի այսօրվա համարում:

Լուսանկարը` Galatv.am-ի