Ադրբեջանը պահանջում է ԵԱՀԿ Մինսկի խմբից հետ կանչել ամերիկացի համանախագահին

Ադրբեջանի փոխարտգործնախարար, ղարաբաղյան հակամարտության գծով այդ երկրի նախագահի անձնական ներկայացուցիչ Արազ Ազիմովը մեղադրանքներ է հնչեցրել Լեռնային Ղարաբաղի հակամարտության կարգավորման ԵԱՀԿ Մինսկի խմբի համանախագահ Ջեյմս Ուորլիքի հասցեին և պահանջել հետ կանչել նրան այն բանի համար, որ նա ցանկություն է հայտնել հանդիպել ԱՄՆ-ի հայկական համայնքի հետ:

Ադրբեջանցի փոխարտգործնախարարն երեկ տարածած հայտարարության մեջ քննադատել է Ուորլիքին' հակամարտության կարգավորման հիմքում ընկած միջազգային իրավունքի սկզբունքներն ու նորմերը «կամայականորեն մեկնաբանելու» համար: Նրա խոսքով' ամերիկացի համանախագահի որոշ արտահայտություններ «ընդհանրապես սադրիչ բնույթ են կրում»: «Մեզ հայտնի է, որ ամերիկացի համանախագահը սերտ կապեր է պահպանում ԱՄՆ-ի հայկական սփյուռքի ներկայացուցիչների հետ: Twitter-ում Ուորլիքի գրառումներ ից երևում է, որ հակամարտության կարգավորման նկատմամբ ամերիկացի համանախագահը հանդես է գալիս չհաշտեցնող դիրքերից, և գերադասում է ավելի շատ շփվել ԱՄՆ-ի հայկական սփյուռքի հետ»,-նշել է նա:

Արազ Ազիմովը Ջեյսմ Ուորլիքին «մեղադրել» է իբրև թե հայերի կողմից «պատվիրված» արտահայտություններ կատարելու մեջ:

Որոշ ԶԼՄ-ներ հայտնել էին, որ Ջեյմս Ուորլիքը մտադիր էր ելույթ ունենալ Կալիֆորնիայում հայկական սփյուռքի կողմից կազմակերպված' «Դեպի առաջ ուղին և Լեռնային Ղարաբաղի Հանրապետության համար ինքնորոշումը» խորագրով միջոցառման ժամանակ: Ազիմովը «գտնում» է, որ ամերիկացի համանախագահի մասնակցությունն այդ միջոցառմանն «անթույլատրելի» է:

Հայտարարության վերջում, որը տարածել է APA լրատվական գործակալությունը, Արազ Ազիմովը պահանջում է. «Ասվածն ադրբեջանական կողմին հիմք է տալիս անվստահություն հայտնելու Մինսկի խմբի ամերիկացի համանախագահին, հրաժարվելու նրա հետ աշխատանքից և դիմելու ԵԱՀԿ գործող նախագահին' համանախագահի պաշտոնից Ուորլիքին հետ կանչելու համար: Ջեյմս Ուորլիքն ադրբեջանական կողմին այլընտրանք չի թողնում»:

Ջեյմս Ուորլիքը Twitter-ի իր էջում նշել էր, որ Լեռնային Ղարաբաղի հակամարտությունը «Ղարաբաղի և Ադրբեջանի միջև է», և ոչ թե Հայաստանի և Ադրբեջանի: Նա նաև համոզմունք էր հայտնել, որ ղարաբաղյան խնդրի լուծման համար բանակցություններում պետք է որպես լիարժեք կողմ ընդգրկվի նաև պաշտոնական Ստեփանակերտը: «Հույն և թուրք կիպրոսցիները հայտարարել են, որ անցել են հիմնախնդրի երկարաժամկետ կարգավորման բանակցությունների: Իսկ ինչո՞ւ նույնը չի կարող լինել Լեռնային Ղարաբաղի դեպքում»,- Twitter-ի իր միկրոբլոգում գրել էր Ուորլիքը:

Այս տարվա փետրվարին Ջեյմս Ուորլիքը հանդիպումներ էր ունեցել Թուրքիայի պաշտոնական շրջանակների հետ, ինչի մասին գրառել էր Twitter-ի իր էջում: «Տարածաշրջանային խնդիրների, այդ թվում նաև Լեռնային Ղարաբաղի հակամարտության կարգավորման հետ կապված թուրքական կառավարության կարծիքն իմանալն օգտակար էր: Մենք հավատարիմ ենք Մինսկի խմբի համանախագահների ձևաչափին», -գրել էր նա:

Լեռնային Ղարաբաղի հակամարտության կարգավորման շուրջ գործընթացը սկսվել է 1994 թ., Բիշքեքում կնքված զինադադարից հետո: Հիմնախնդրի կարգավորման շուրջ բանակցություններն ընթանում են ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) միջնորդությամբ: Ներկայումս բանակցություններն ընթանում են 2007 թ. նոյեմբերին համանախագահների կողմից ներկայացված մադրիդյան սկզբունքների հիման վրա: Հայաստանը համոզված է, որ կարգավորման գործընթացի արդյունավետության բարձրացումն անհնար է առանց բանակցություններին հակամարտության կողմ հանդիսացող Լեռնային Ղարաբաղի լիիրավ մասնակցության: