Մեխակն իսկական հայ էր, իսկական երկրապահ. Արագած գյուղում հարգեցին Մեխակ Մեխակյանի հիշատակը

Հիշատակման օր էր Էջմիածնի Արագած գյուղում: 20 տարի առաջ մայիսի մեկին Մարտակերտի Թալիշ բնակավայրի ազատագրման համար մղված մարտերում զոհվեց Արագած գյուղի բնակիչ, լեգենդար 5-րդ մոտոհրաձգային բրիգադի մարտիկ Մեխակ Մեխակյանը:

Մեխակը պատմաբան էր, քաջատեղյակ հայոց պատմությանը և գիտակցաբար էր զենք վերցրել' հող հայրենին թշնամուց պաշտպանելու: Նշանակվել էր ՆԳՆ 6-րդ գլխավոր վարչությունում բաժնի պետ, սակայն, թողեց պաշտոնն ու ամեն ինչ և դարձյալ մեկնեց ճակատ' առաջին գիծ: Մեխակը զոհվեց 1994-ի մայիսի 1-ին' հրադադարի կնքումից ընդամենը 11 օր առաջ: Սակայն, հիշատակի միջոցառումը հերթական ապացույց է, որ Մեխակն ու մնացյալ մեր նահատակ տղաներն անմահ են:

Գեղեցիկ ցերեկույթ էր կազմակերպվել Արագած համայնքի' Մեխակ Մեխակյանի անունը կրող դպրոցում: Միջոցառմանը ներկա էին մարտական ընկերները, հարազատներ, ԵԿՄ վարչության նախագահ, Արցախի հերոս Մանվել Գրիգորյանը, ով եղել է Մեխակի անմիջական հրամանատարը, ԵԿՄ Էջմիածնի տարածքային բաժանմունքի նախագահ Կարեն Գրիգորյանը, պատանի, երիտասարդ երկրապահներ: Ներկա էր նաև Պաշտպանության նախարար Սեյրան Օհանյանը' բարձրաստիճան սպաների ուղեկցությամբ: Մեխակ Մեխակյանը հետմահու պարգևատրվել է մի շարք մեդալներով, շքանշաններով' ՀՀ և ԼՂՀ Մարտական ծառայության առաջին աստիճանի շքանշան, «Մարտական ծառայություն» հուշամեդալ, երկրապահական պարգևներ և այլն: Սակայն, ինչպես ԵԿՄ վարչության նախագահ, Արցախի հերոս, գեներալ-լեյտենանտ Մանվել Գրիգորյանը նկատեց' Մեխակի ամենամեծ գնահատականը ժողովուրդն է տվել, Մեխակը հավերժ ապրելու է սերունդների հիշողություններում: Գեներալը նաև հավելեց. «Մեխակն իսկական հայ էր, իսկական երկրապահ: Նա պատմաբան էր և գիտակցված էր մեկնել սահմանային գոտում հայոց պատմություն դասավանդելու, գիտակցված էլ զենք վերցրեց և ընտրեց անմահության ճանապարհը: Հավերժ փառք Մեխակին»: Պաշտպանության նախարար, գեներալ-գնդապետ Սեյրան Օհանյանն էլ, կարևորելով Մեխակի և նրա նման տղաների սխրանքը, կարծիք հայտնեց, որ այսօր նոր քաջերի թրծման դարբնոց է Երկրապահ կամավորականների միությունը: Նախարարն անչափ կարևորեց այն աշխատանքը, որ Մանվել Գրիգորյանի նախաձեռնությամբ կատարվում է պատանի և երիտասարդ երկրապահների հետ:

Միջոցառման ավարտին բոլոր ներկաները եղան նաև Արագածի' զոհվածների պանթեոնում, ծաղիկներ խոնարհեցին Մեխակ Մեխակյանի և Արագած գյուղի մնացյալ նահատակների դամբարանին: