ՀՅԴ–ն կպայքարի նաև մեծամասնական ընտրակարգով. Արմեն Ռուստամյան

«Մեր գլխավոր խնդիրը իշխանությունների վերարտադրումը կանխելն է, և եթե մենք հարց ենք դնում դա անելու ընտրությունների միջոցով, մենք չենք կարող անտեսել այն, ինչ փաստացի գոյություն ունի։ Մենք պետք է աշխատենք նաև 41 ընտրատարածքում էլ «ճակատամարտ» տալ», – Լուրեր.com-ի թղթակցի հետ զրույցում նշեց ՀՅԴ պատգամավոր Արմեն Ռուստամյանը։ Այս կարծիքը նա հայտնեց այն բանից հետո, երբ 30 կողմ, 56՝ դեմ ձայների հարաբերակցությամբ  Ազգային ժողովը մերժեց խառը ընտրակարգից 100% համամասնական ընտրակարգի անցնելու փոփոխությունների նախագիծը։

Հիշեցնենք, որ նախօրեին ԱԺ շենքի դիմաց անցկացվել էր խառը ըտրակարգի պահպանման դեմ բողոքի ցույց , որին մասնակցում էին ՀՅԴ–ի, ՀԱԿ–ի և «Ժառանգություն» կուսակցության ներկայացուցիչները։

Թե ինչ քայլերի հաջորդականություն է նախատեսվում այժմ, երբ նախագիծը մերժվեց ԱԺ կողմից, Արմեն Ռուստամյանը նշեց. «Սա առնվազն երկու շատ մեծ դաշտ է առաջացնում, որ մենք պետք է աշխատենք. պետք է համախմբել ուժերը, որպեսզի վերահսկողությունը մեծացնենք ընտրատեղամասերում։...Երկրորդը՝ առանձին մարտավարություն է պետք մշակել՝ իրականացնելու համար մեծամասնական ընտրակարգի հետ կապված հարցեր»։

«Հիմա ինչքանով դա կհաջողվի, դժվար է ասել, որովհետև այդ ընտրակարգը գաղափարական–քաղաքական մրցակցության հետ կապ չունեցող ընտրակարգ է», – եզրափակեց պատգամավորը։