Բոլոր ճանապարհները տանում են դեպի ՀՀԿ

Օրերս Ազգային ժողովում` լրագրողների հետ ճեպազրույցում, ՀՀ ԱԺ փոխնախագահ, ՀՀԿ մամուլի խոսնակ Էդուարդ Շարմազանովը նախագահ կամ վարչապետ դառնալու ճանապարհը ցույց տվեց:

Վերջինիս խոսքով` Հայաստանի նախագահ կամ վարչապետ դառնալու հավակնողները դեպի այդ պաշտոնը գնալու մեկ ուղի ունեն' Մելիք Ադամյան փողոցը, որտեղ տեղակայված է ՀՀԿ գլխավոր գրասենյակը:

Բացի այդ, Շարմազանովը նաև ասել էր, որ ՀՀԿ-ն ապագա տասնամյակում շարունակելու է մնալ Հայաստանի քաղաքական համակարգի առաջատար: Ապագա տասնամյակում որոշիչը լինելու է ՀՀԿ-ն և այն լինելու է Հայաստանի քաղաքական դաշտի թիվ մեկ ջութակը:

Լուրեր.com-ի թղթակիցը փորձեց մեկնաբանություններ ստանալ ՀՀԿ-ական պատգամավորներից, արդյոք նրանք ևս կիսում են իրենց կուսակցի միտքը, սակայն, ինչպես պարզվեց, պատգամավորների հետ կապվելն այդքան էլ դյուրին չէր:

ՀՀԿ խմբակցության պատգամավոր Արտակ Դավթյանը հարցը լսելուն պես` խուսափեց պատասխանից. «Այդ ամեն ինչն արդեն ասված է, ես չեմ ուզում մեկնաբանել»: 

Պատգամավոր Նաիրա Կարապետյանը ղեկին էր. սեփական անվտանգության նկատառումներից ելնելով` չցանկացավ մեզ հետ զրուցել:

Արտակ Զաքարյանն էլ զբաղված էր:

Իսկ Մարգարիտ Եսայանն անգամ հեռախոսազանգին չպատասխանեց:

Անհասանելի ՀՀԿ-ականներ ևս կային: Հավանաբար, նրանք բոլորն էլ շտապում են դեպի Մելիք Ադամյան փողոց, որտեղ տեղակայված է ՀՀԿ գլխավոր գրասենյակը: