Բաքվում ԱՄՆ դեսպանատունը Ջեյմս Ուորլիքին հետ կանչելու Ադրբեջանի ԱԳՆ-ի հայտարարությունն անհիմն է համարում

Բաքվում ԱՄՆ-ի դեսպանությունը հայտարարել է, որ համաձայն չէ Ադրբեջանի փոխարտգործնախարար Արազ Ազիմովի' մայիսի 1-ին արած հայտարարության հետ և միանգամայն անհիմն է համարում Լեռնային Ղարաբաղի հակամարտության խաղաղ կարգավորման գծով ԵԱՀԿ Մինսկի խմբի ամերիկացի համանախագահ Ջեյմս Ուորլիքին հետ կանչելու մասին նրա պահանջը: Այս մասին հայտնում է modern.az լրատվական կայքը:

Ադրբեջանական կայքը հայտնում է, որ դեսպանատանը նաև նշել են, որ ԱՄՆ-ն հավատարիմ է մնում ղարաբաղյան հակամարտության խաղաղ կարգավորման գործընթացին:

Ղարաբաղյան հակամարտության կարգավորման գծով Ադրբեջանի Նախագահի անձնական ներկայացուցիչ Արազ Ազիմովը ԵԱՀԿ Մինսկի խմբի ամերիկացի համանախագահ Ջեյմս Ուրլիքին մեղադրել էր ԱՄՆ-ի հայկական սփյուռքի հետ «կապեր» ունենալու մեջ և հայտարարել նրան հետ կանչելու վերաբերյալ հարցի հնարավոր քննարկման մասին: Արազ Ազիմովը Ջեյսմ Ուորլիքին «մեղադրել» է Twitter-ում իբրև թե հայերի կողմից «պատվիրված» արտահայտություններ կատարելու մեջ: Ազիմովը «գտնում» է, որ ամերիկացի համանախագահի մասնակցությունը Կալիֆորնիայում հայկական սփյուռքի կողմից կազմակերպված' «Դեպի առաջ ուղին և Լեռնային Ղարաբաղի Հանրապետության համար ինքնորոշումը» խորագրով միջոցառմանն «անթույլատրելի» էր:

Ջեյմս Ուորլիքը Twitter-ի իր էջում խոստովանել էր, որ Լեռնային Ղարաբաղի հակամարտությունը «Ղարաբաղի և Ադրբեջանի միջև է», և ոչ թե Հայաստանի և Ադրբեջանի: Նա նաև համոզմունք էր հայտնել, որ ղարաբաղյան խնդրի լուծման համար բանակցություններում պետք է որպես լիարժեք կողմ ընդգրկվի նաև պաշտոնական Ստեփանակերտը:

Լեռնային Ղարաբաղի հակամարտության կարգավորման շուրջ գործընթացը սկսվել է 1994 թ. Բիշքեքում կնքված զինադադարից հետո: Հիմնախնդրի կարգավորման շուրջ բանակցություններն ընթանում են ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) միջնորդությամբ: Ներկայումս բանակցություններն ընթանում են 2007 թ. նոյեմբերին համանախագահների կողմից ներկայացված մադրիդյան սկզբունքների հիման վրա: Հայաստանը համոզված է, որ կարգավորման գործընթացի արդյունավետության բարձրացումն անհնար է առանց բանակցություններին հակամարտության կողմ հանդիսացող Լեռնային Ղարաբաղի լիիրավ մասնակցության: