«Ոչխարների խուզում» փառատոնի մրցույթի հաղթողները հայտնի կդառնան մեկ շաբաթից

Ոչ միայն Հայաստանում, այլեւ տարածաշրջանում առաջին անգամ, Տաթեւի հովտում' «ՏաԹեւեր» ճոպանուղու «Հալիձոր» կայանի հարակից տարածքում, մայիսի 3-ին կազմակերպված «Ոչխարների խուզում» փառատոնին մասնակցեցին ոչ միայն սյունեցիներ, այլեւ հարյուրավոր հյուրեր մայրաքաղաքից, հանրապետության տարբեր մարզերից, մեծ թվով սփյուռքահայեր ու օտարերկրացիներ։

Փառատոնի մասնակցիներին ՀՀ վարչապետ Հովիկ Աբրահամյանի ողջույնները փոխանցեց գյուղատնտեսության նախարար Սերգո Կարապետյանը, ով Սյունիքում էլ տեղեկացավ իր զբաղեցրած պաշտոնում վերանշանակվելու մասին։ «Սյունիքը հանրապետության լավագույն գյուղատնտեսական մարզն է, եւ այստեղ զարգացած է ոչխարաբուծությունը։ Վայց Ձորում ամեն տարի կազմակերպվում է Գինու փառատոն, Տավուշում' Մեղրի փառատոն, սա երրրոդ մասնագիտական փառատոնն է, որը պետք է շարունակական լինի», - ասաց գյուղնախարարը։

Սյունիքի մարզպետ Վահե Հակոբյանը նախ հայտնեց իր շնորհակալությունը մարզում նման նախաձեռնության անցկացման համար, ապա՝ իր պատրաստակամությունն՝ այսուհետ եւս աջակցելու նման փառատոնների անցկացմանը մարզում։ «Այսօր տոն է Սյունիքում, մենք փորձում ենք վերականգնել երբեմնի մեր ավանդույթները», - ասաց մարզպետը եւ տեղեկացրեց, որ առաջիկայում մարզում կանցկացվի նաեւ «Սյունիքի բարիքներ» փառատոնը։

Միջոցառման ընթացքում հայկական եւ ակումբային երաժշտական կատարումներով ելույթ ունեցավ DJ Վակցինան, «Կարին» պարի համույթը։ Խոտ, Շինուհայր, Հալիձոր, Տաթև, Սվարանց, Տանձատափ, Հարժիս գյուղական համայնքները փառատոնին ներկայացել էին իրենց տաղավարներով' ցուցադրելով գյուղական տեղական արտադրության ապրանքներ, մթերքներ ու խմիչքներ։ Միջոցառմանը մասնակցեցին նաեւ ՀՀ-ում ԱՄՆ դեսպան Ջոն Հեֆերնը, Նորվեգիայի պատվավոր հյուպատոս Թիմըթի Սթրեյդը, միջազգային կազմակերպույթւոնների ղեկավարներ։

Սակայն փառատոնի աշխատանքները կիսատ մնացին հանկարծակի սկսված ուժեղ փոթորիկի պատճառով։ Ոչխարների խուզման երրորդ փուլը չկայացավ։ Ըստ կազմակերպիչների' այն կանցկացվի մեկ շաբաթ հետո, որի ժամանակ էլ հայտնի կդառնան հաղթողները եւ կանցկացվի մրացանակաբաշխություն։

«Ոչխարների խուզում» փառատոնը, որը կազմակերպել էին «Տաթեւի վերածնունդ» եւ «Հայրենիքի զարգացման նախաձեռնություն» հիմնադրամները' ՀՀ-ում Նորվեգիայի պատվավոր հյուպատոսի առաջարկով, Սյունիքում կդառնա ամենամյա։