ՀՀ-ում ԱՄՆ դեսպանը մասնակցեց Սյունիքում կազմակերպված մի շարք միջոցառումների

Սյունիքում մայիսի 3-ին կազմակերպված մի շարք միջոցառումներին մասնակցելու եւ ԱՄՆ Միջազգային զարգացման գործակալության ֆինանսավորմամբ իրականացվող ծրագրերին տեղում ծանոթանալու նպատակով մարզ էր ժամանել ՀՀ-ում ԱՄՆ արտակարգ եւ լիազոր դեսպան Ջոն Հեֆերնը։

Առավոտյան դեսպանը մասնակցեց Տաթեւի հովտում հանրապետությունում առաջին անգամ կազմակերպված «Ոչխարների խուզում» փառատոնին, որից հետո եղավ Կապանի տարածաշրջանի Սրաշեն գյուղում եւ տեղում ծանոթացավ իրականացվող ականազերծման աշխատանքներին։

Այնուհետեւ դեսպանը Կապանի քաղաքապետարանում հանդիպեց քաղաքապետ Աշոտ Հայրապետյանի հետ։ Դեսպանը եղավ քաղաքապետարանի վերջերս նորոգված եւ ժամանակակից տեխնիկայով ու գույքով համալրված ընդհանուր բաժնում, որտեղ արդեն մի քանի ամիս է, ինչ գործում է քաղաքացիների սպասարկման «մեկ պատուհանի» սկզբունքը, որը քաղաքապետարանում, էլեկտրոնային փաստաթղթաշրջանառության հետ միասին, իրականություն է դարձել «Քաունթերփարթ Ինթերնեյշնլ» կազմակերպության ծրագրով' ԱՄՆ Միջազգային զարգացման գործակալության եւ համայնքային բյուջեի համատեղ ֆինանսավորմամբ։

Քաղաքապետի հետ հանդիպմանը դեսպանը իր գոհունակությունը հայտնեց կատարված աշխատանքների կապակցությամբ։ «Ծառայությունների որակի բարձրացման առումով Դուք շատ գործ եք կատարել կապանցիների համար», - ասաց դեսպանը։ Նշվեց, որ մեկ տարվա ընթացքում ԱՄն Միջազգային զարգացման գործակալությւան հետ Կապանում իրականացվել է 4 ծրագիր։ «Մեկ խոշոր ծրագիր եւս' էլեկտրոնային գրադարանի հիմնումն ընթացքի մեջ է։ Այն կլինի առաջինը տարածաշրջանում եւ կհամագործակցի Հայաստանում Ամերիկյան համալսարանի հետ», - նշեց քաղ աքապետը։ Դեպանը հետաքրքրվեց նաեւ Կապանի սոցիալ-տնտեսական վիճակով, կանգ առավ հանքարդյունաբերության մի շարք հարցերի վրա։ Դեսպանին հետաքրքրեց նաեւ, թե կարողանում են արդյոք բնակիչներն իրենց ունեցած բողոքները ներկայացնել քաղաքապետարան։ Պատասխանելով դեսպանի հարցին, քաղաքապետն ասաց, որ քաղաքացիները հնարավորություն ունեն մասնակցելու ավագանու բոլոր նիստերին, ներկայացնելու իրենց պահանջները, բողոքները։ Քաղաքացիները դիմում են քաղաքապետարան' ներկայացնելով գրավոր դիմումներ, նաեւ դիմուներ են ստացվում էլեկտրոնային տարբերակով, անգամ՝ սոցիալական ցանցերով։

Հանդիպումից հետո դեսպանը մասնակցեց Կապանի Վազգեն Սարգսյնաի անվան մանկական զբոսայգում, ԱՄՆ դեսպանատան մշակութային բաժնի նախաձեռնությամբ կազմակերպված Imagine Band խմբի բացօթյա ելույթին։ Մինչ այդ, դարձյալ ԱՄՆ դեսպանատան մշակութային բաժնի նախաձեռնությամբ, Կապանի մշակույթի կենտրոնի փոքր դահլիճում կապանցիների համար անցկացվել էին քանթրի-պարի անվճար վարպետության դասեր։ Նման միջոցառում մայիսի 2-ին ԱՄն դեսպանատունը կազմակերպել էր մարզի մեկ այլ քաղաքում' Մեղրիում, որի նպատակը Հայաստանում ամերիկյան մշակութային բազմազանությունը ներկայացնելն է։