ԵՊԲՀ ուսանողները դեպի Զվարթնոց հեծանվարշավով քարոզել են առողջ ապրելակերպ

Դեպի Զվարթնոց տաճար հեծանվարշավով մայիսի 3-ին ամփոփվեց «Առողջ բժիշկ» սպորտային միջոցառումների շարքը, որը կազմակերպել էին Երևանի պետական բժշկական համալսարանի (ԵՊԲՀ) Ուսանողական խորհրդարանը և Հայաստանի երիտասարդական հիմնադրամը:

Վաղ առավոտյան ծրագրի շուրջ 100 մասնակիցներ Երևանի Շահումյանի անվան հրապարակից հեծանիվներով շարժվեցին դեպի Զվարթնոց տաճար: Ճանապարհին մասնակիցները կանգ առան Սուրբ Հովաննես եկեղեցում, ստացան հոգևորականի օրհնություն: Մասնակիցները այցելեցին նաև Զվարթնոց տաճար, թանգարան: Հեծանվարշավին մասնակցում էին ԵՊԲՀ ուսանողներ և դասախոսներ, Մանկավարժական համալսարանի ուսանողներ և ՀԵՀ-ի կամավորներ:

Առողջ ապրելակերպ քարոզող «Առողջ բժիշկ» սպորտային միջոցառումների շարքի շրջանակներում ԵՊԲՀ ուսանողներն ու աշխատակիցները մրցել են տարբեր սպորտաձևերում՝ ֆուտբոլ, վոլեյբոլ, շախմատ, սեղանի թենիս, պարանի ձգում, Brain ring, իսկ ծրագրի ամփոփումը տեղի ունեցավ հեծանվարշավի տեսքով: Մրցակցությունն ընթացել է ԵՊԲՀ Ընդհանուր բժշկության, Ստոմատոլոգիական, Դեղագիտական, Արտասահմանցի ուսանողների ֆակուլտետների և համալսարանի աշխատակիցների միջև:

ՀԵՀ ծրագրերի իրականացման ծառայության ղեկավար Արուսյակ Պողոսյանը նկատել է, որ այս ծրագիրը ՀԵՀ-ի կազմակերպած ծրագրերից առաջինը չէ, որ ուղեկցվում է հեծանվարշավով: «Կարևորում ենք առողջ ապրելակերպի մշակույթի տարբեր դրսևորումները, հատկապես, երիտասարդական ոլորտում: Առավել կարևոր է, երբ դա կազմակերպում են ԵՊԲՀ ուսանողները, և դրան միանում են բազում այլ երիտասարդներ»,-շեշտել է ծրագրերի իրականացման ծառայության ղեկավարը:

Արուսյակ Պողոսյանը հույս է հայտնել, որ նման միջոցառումներն ավելի շատ կլինեն, ինչն էլ կնպաստի, որ քաղաքում հեծանիվը՝ որպես փոխադրամիջոց օգտագործելու մշակույթ, առավել լայն տարածում կգտնի:

ԵՊԲՀ ուսանողական խորհրդարանի փոխնախագահ Անի Ռափյանը, կարևորելով ծրագիրը, նշել է. «Ծրագրի նպատակն է քարոզել առողջ ապրելակերպ մասնակիցների և հատկապես ուսանողների շրջանում: Որպես բժիշկներ' մենք քարոզում ենք նաև ֆիզիկական առողջությունը և պատրաստվածությունը»: