Ռեպորտաժի շնորհիվ սփյուռքահայ բարերարը օգնել է Բաղանիս գյուղին

Այս տարի հունվարի 30-ին «CIVILNET»-ը հյուրընկալվեց Հայաստանի ամենաերիտասարդ գյուղապետին: Տավուշի մարզի Բաղանիս գյուղի 27-ամյա համայնքապետ Նարեկ Սահակյանը «Հայաստանի ամենաերիտասարդ գյուղեպետը» վերնագրով ռեպորտաժի ընթացքում ներկայացրեց սահմանապահ գյուղի հոգսերն ու խնդիրները, ձեռքբերումներն ու առաջընթացը: Երիտասարդ համայնքապետը պատմեց սահմանային միջադեպերի, սարերի գրկում ծվարած լեռնային գյուղի կյանքի լավի ու վատի մասին: Ուրախալի էր, որ նյութը համացանցում տեղադրելուց հետո սփյուռքից բավականին մեծ արձագանքներ եղան: Համացանցի միջոցով նախ բազմաթիվ մարդիկ իրենց շնորհակալությունն էին հայտնում երիտասարդ գյուղապետին' ակտիվ և հայրենանվեր աշխատանքի համար ու իրենց աջակցությունն առաջարկում տարբեր խնդիրների կարգավորման հարցում:

Նարեկ Սահակյանը մեզ պատմեց Հայաստանում ծնված, բայց Ամերիկայում բնակվող Հարություն Կարապետի Կարմիրյանի և բաղանիսցիների արդեն ձևավորված բարեկամության մասին: Հարություն Կարմիրյանը, տեսնելով ռեպորտաժը, ոգևորվելով երիտասարդ համայնքապետի նվիրվածությամբ ու աշխատասիրությամբ, ցանկանում է իր ներդրումն ունենալ Բաղանիսի զարգացման գործում:

Նա համացանցի միջոցով փնտրում և գտնում է Նարեկ Սահակյանին և առաջարկում ինչ-որ բանով օգտակար լինել սահմանապահ հայ գյուղացուն: Նարեկ Սահակյանի հետ խոսելով գյուղի հոգսերից և իմանալով, որ գյուղում աղբահանության խնդիր կա' Կարմիրյանը որոշում է Բաղանիսին աղբամաններ նվիրել:

15 նոր ու ժամանակակից աղբամաններն արդեն գյուղում են, իսկ աղբահանության խնդիրը կարելի է համարել լուծված: Այսօր էլ կատարվել է աղբամանների տեղադրման ու ամրացման աշխատանքները: «Քննարկումների ժամանակ իմացա, որ սա պարոն Կարմիրյանի առաջին բարեգործական նախաձեռնություն չէ: Ամերիկաբնակ բարերարի աջակցությունից օգտվել են ինչպես անհատներ, 1990-ական թվականներից սկսած նա աջակցություն է ցուցաբերել ինչպես հաշմանդամ, այնպես էլ զոհված ազատամարտիկների ընտանիքներին, մեր հաղթանակած բանակին: Իր բարեգործական նախաձեռնությունների համար Հարություն Կարմիրյանը բազմաթիվ շնորհակալական պարգևատրումներ է ստացել ՀՀ պաշտպանության նախարարության կողմից»,-իր խոսքում նշում է Նարեկ Սահակյանն ու իր և բաղանիսցիների կողմից շնորհակալություն հայտնում նրան' արագ արձագանքելու և օժանդակություն ցույց տալու համար:

Երիտասարդ համայնքապետն ասում է, որ շատ կցանկանար, որ հայ գյուղն ու գյուղացին միշտ լինեն թե՛ սփյուռքում և թե՛ հայրենիքում ապրող կայացած ու հարուստ անհատների ուշադրության կենտրոնում, և Հարություն Կարմիրյանի օրինակը վարակիչ լիներ: Չէ՞ որ գյուղն է կերակրում քաղաքին, չէ՞ որ գյուղն ու գյուղացին են նաև մեր երկրի սահմանապահը: Իսկ Բաղանիսի և Հարություն Կարմիրյանի բարեկամությունն ու համագործակցությունը շարունակվում է. արդեն մշակվել են հստակ ծրագրեր հետագա անելիքների համար: Համագործակցությունը շարունակելի է լինելու: