Թուրքիան Էրդողանի հետ վերածվել է դասական ոստիկանական պետության. բրազիլացի ծաղրանկարիչ

Ծագումով լիբանանցի բրազիլացի հայտնի ծաղրանկարիչ Կառլոս Լաթուֆը հայտարարել է, որ վարչապետ Ռեջեփ Թայիփ Էրդողանի կառավարության օրոք Թուրքիան վերածվել է դասական ոստիկանական պետության: Թուրքական «Զաման» թերթի հետ զրույցում աշխարհահռչակ ծաղրանկարիչը Twitter և YouTube սոցիալական ցանցերը թուրքական կառավարության կողմից արգելափակվելու առնչությամբ ասել է, որ վարչապետ Էրդողանի' ժողովրդավարության վերաբերյալ հայտարարությունները լուրջ լինելուց հեռու են և ուղղված են միայն իր համակիրներին:

2006 թ. «Լավագույն ծաղրանկար» միջազգային մրցույթի 45-ամյա շքանշանակիր Կառլոս Լաթուֆը, ով հայտնի է օրակարգային միջազգային իրադարձությունների հետ կապված իր յուրահատուկ ծաղրանկարներով, հայտարարել է, որ լուրջ չեն անգամ 2011 թ. մայիսի 31-ին թուրքական «Մավի Մարմարա» նավում 9 թուրք քաղաքացիների զոհվելու առնչությամբ Իսրայելի հասցեին Էրդողանի արած հայտարարությունները: «Դրանք ընդամենը միզանսցեն են: Եթե Էրդողանի հայտարարությունները լուրջ լինեին, նա կխզեր դիվանագիտական հարաբերությունները Իսրայելի հետ», -ասել է նա:

Ծաղրանկարիչը զարմանք է հայտնում, թե ինչպես կարող է իրեն քննադատող լրագրողներին բանտ նետող, բնապահպանական պահանջներով խաղաղ ցույցերի մասնակիցներին բռնությունների ենթարկող, իր քաղաքացի քրդերի իրավունքները ոտնահարող Էրդողանը ժողովրդավար համարվել, ինչպես նա ներկայացվում է Թուրքիայում:

Կառլոս Լաթուֆի կարծիքով, անցյալ դեկտեմբերին Թուրքիան ցնցած կոռուպցիոն սկանդալը բոլորովին էլ անակնկալ չէր, անակնկալն այն է, թե ինչպես են կառավարությունները պայքարում այդ ապօրինությունների և կաշառակերության հետ: «Թուրքիայում վարչապետ Էրդողանը ժողովրդից թաքցրեց իշխանության մասնակցությամբ կոռուպցիոն սկանդալը և հարձակվեց դա բացահայտած մամուլի վրա», -նշել է նա:

Ծաղրանկարիչն աջակցություն է հայտնել Թուրքիայում կոռուպցիոն սկանդալի դեմ կանգնած ակտիվիստներին, և ասել, որ իր աջակցությունը ինքն անում է Էրդողանի մասին ծաղրանկարներով: