Որքանով է Երևանի ավագանին հասանելի իր ընտրողների համար

Մեկ տարի առաջ այս օրը տեղի ունեցավ Երևանի քաղաքապետի ընտրությունը: ՀՀԿ-ն հաղթեց, և Տարոն Մարգարյանն ընտրվեց քաղաքապետ:

Հարցազրույց Երևանի քաղաքապետի խորհրդական, ավագանու համակարգող Գագիկ Բաղդասարյանի հետ.

Պարոն Բաղդասարյան, Դուք համակարգում եք Երևանի ավագանու գործունեությունը, ինչպիսի՞ն է ըստ Ձեզ Երևանի 2-րդ գումարման ավագանին:

Եթե նախորդ գումարման ավագանու աշխատանքներին այդպես էլ չմասնակցեց ՀԱԿ խմբակցությունը, ապա 2-րդ գումարման Երևան քաղաքի ավագանում ներկայացված են մայրաքաղաքի բնակչության վստահության քվեն ստացած բոլոր երեք քաղաքական ուժերը, որոնց ներկայացուցիչներն ընդգրկված են ավագանու մշտական գործող 4 հանձնաժողովներում: Մշտական հանձնաժողովներն ավագանու օրակարգի նախագծում ընդգրկված հարցերը նախապես քննարկում են հանձնաժողովների նիստերում, որոնց վերաբերյալ տալիս են եզրակացություններ։ Սա, անշուշտ, միանշանակ նպաստում է ավագանու աշխատանքի առավել արդյունավետությանը, ինչի մասին է վկայում նաև վիճակագրությունը: Այսպես. Մինչ օրս ավագանին գումարել է 13 նիստ, որոնց ընթացքում ընդունվել է թվով 162 որոշում /որից՝ 29-ը՝ նորմատիվ/: Դրանք սահմանված ժամկետներում առաքվել են համապատասխան կառուցվածքային ստորաբաժանումներին և վարչական շրջանների ղեկավարների աշխատակազմերին։

Այդ որոշումներից 147-ը կատարվել , 15-ը ընթացքի մեջ է ։ Երևանի ավագանու խմբակցությունների, հանձնաժողովների և ավագանու անդամների կողմից ներկայացվել է թվով 133 գրություն, որոնք սահմանված ժամկետներում քննարկվել են և տրվել են պատասխաններ, մասնավորապես՝ «Բարգավաճ Հայաստան» խմբակցություն՝ 14, «Բարև Երևան» խմբակցություն – 93, «Հանրապետական կուսակցություն» խմբակցություն – 25, ֆինանսավարկային և տնտեսական հարցերի մշտական հանձնաժողով - 1 գրություն։

Պարոն Բաղդասարյան, Երևանի ավագանին որքանով է, այսպես ասենք, հասանելի իր ընտրողներին:

Երևանի քաղաքապետարանի պաշտոնական կայքում գործում է «ԱՎԱԳԱՆԻ» բաժինը, որտեղ տեղադրված են Երևան քաղաքի ավագանու անդամների կենսագրությունները, ինչպես նաև ներկայացված է Երևանի ավագանու խմբակցությունների ու մշտական հանձնաժողովների կազմերը և հանձնաժողովների կանոնակարգերը։ 2013 թվականի հունիսի 15-ից մինչև դեկտեմբերի 28-ն ընկած ժամանակահատվածում քաղաքացիների, ինչպես նաև տարբեր կազմակերպությունների կողմից Երևանի ավագանու անդամներին հասցեագրվել է 92, իսկ 2014 թվականի առաջին եռամսյակում՝ 24 դիմում: Դրանք բոլորը հաշվառվել և տրամադրվել են հասցեատերերին։ Ի դեպ, Երևանի ավագանու նիստերի սղագրությունները ավագանու կանոնակարգով սահմանված ժամկետներում, տեղադրվում են Երևանի քաղաքապետարանի պաշտոնական կայքում։

Բացի այդ, ավագանու բոլոր նիստերի մասին հայտարարությունները նույնպես սահմանված կարգով տեղադրում են կայքում և բոլոր լրատվամիջոցներն ազատ են ներկա գտնվել և լուսաբանել ավագանու ցանկացած նիստ:

Առաջիկայում նախատեսվում է Երևանի քաղաքապետարանի պաշտոնական համացանցային www.yerevan.am կայքում ստեղծել Երևան քաղաքի բնակչության կողմից ավագանու անդամներին ուղղված հարցերի համար առանձին էջ։